IPL 2026 : मुंबईला प्ले-ऑफचा 'अलार्मिंग अलर्ट', पहिल्याच आठवड्यात पॉईंट्स टेबलमध्ये उलथापालथ!

आयपीएलच्या पहिल्या आठवड्यातल्या जवळपास प्रत्येक सामन्यांमध्ये कांटे की टक्कर पाहायाला मिळाली आहे, त्यामुळे प्ले-ऑफला पोहोचण्यासाठी प्रत्येक टीमला झगडावं लागणार आहे.

आयपीएलच्या पहिल्या आठवड्यात झालेल्या 11 सामन्यांच्या निकालानंतर काही टीमना नेट रनरेटवरही प्ले-ऑफमध्ये जावं लागू शकतं, त्यामुळे प्रत्येक टीमला पराभव होत असला तरी पराभवाचा फरक कमी करावा लागणार आहे.

आयपीएल पॉईंट्स टेबलमध्ये सध्या गतविजेती आरसीबी पहिल्या क्रमांकावर आहे. आरसीबीने त्यांचे 2 पैकी 2 सामने जिंकले आहेत, त्यामुळे त्यांच्या खात्यात 4 पॉईंट्स आहेत. आरसीबीचा नेट रनरेटही सर्वाधिक +2.501 आहे.

2 सामन्यांमध्ये 2 विजय मिळवणारी राजस्थान रॉयल्स दुसऱ्या क्रमांकावर आहे. 4 पॉईंट्ससह राजस्थानचा नेट रनरेट +2.233 एवढा आहे. राजस्थानने चेन्नई आणि गुजरातचा पराभव केला आहे.

राजस्थानप्रमाणेच दिल्ली कॅपिटल्सनेही 2 पैकी 2 सामने जिंकले आहेत, पण दिल्लीचा नेट रनरेट +1.170 आहे, त्यामुळे दिल्ली पॉईंट्स टेबलमध्ये तिसऱ्या क्रमांकावर आहे. दिल्लीने लखनऊ आणि मुंबईचा पराभव केला आहे.

पंजाब किंग्सने त्यांच्या 2 सामन्यांमध्ये गुजरात आणि चेन्नईला धूळ चारली. +0.637 नेट रनरेट असल्यामुळे पंजाब पॉईंट्स टेबलमध्ये चौथ्या क्रमांकावर आहे.

सनरायजर्स हैदराबादने 3 पैकी फक्त एकच मॅच जिंकली आहे. आरसीबी आणि लखनऊविरुद्ध हैदराबादचा पराभव झाला तर केकेआरविरुद्ध त्यांनी विजय मिळवला. 2 पॉईंट्स आणि +0.275 नेट रनरेटसह हैदराबाद पाचव्या क्रमांकावर आहे.

मुंबई इंडियन्सने 2 पैकी एका सामन्यात विजय मिळवला आणि एका सामन्यात त्यांचा पराभव झाला. केकेआरविरुद्ध विजय मिळवल्यानंतर मुंबईला दिल्लीविरुद्ध पराभवाचा धक्का बसला.

दिल्लीविरुद्ध मोठा पराभव झाल्यामुळे मुंबईचा नेट रनरेट हा मायनसमध्ये आहे. -0.206 नेट रनरेट असल्यामुळे मुंबईला पुढच्या सामन्यांमध्ये त्यांची कामगिरी सुधारावी लागणार आहे. मुंबईची टीम सध्या सहाव्या क्रमांकावर आहे.

मुंबईप्रमाणेच लखनऊचाही 2 पैकी एका सामन्यात विजय आणि एका सामन्यात पराभव झाला. पण लखनऊचा नेट रनरेट हा मुंबईपेक्षा खराब आहे. -0.542 नेट रनरेट असल्यामुळे लखनऊ सातव्या क्रमांकावर आहे. लखनऊचा दिल्लीविरुद्ध पराभव झाल्यानंतर त्यांनी हैदराबादवर विजय मिळवला.

गुजरात, केकेआर आणि चेन्नई यांचा एकाही सामन्यात विजय झालेला नाही, त्यामुळे या टीम पॉईंट्स टेबलमध्ये तळाला आहेत. गुजरातचा नेट रनरेट -0.424, केकेआरचा नेट रनरेट -1.964 आणि सीएसकेचा नेट रनरेट -2.517 आहे.