TRENDING:
चालकाला लांबूनच दिसणार पुढचा सिग्नल
रेल्वे प्रवास अधिक सुरक्षित आणि वेगवान करण्यासाठी भारतीय रेल्वेकडून कवच 4.0 ही आधुनिक सुरक्षा प्रणाली लागू केली जात आहे. ही प्रणाली इंजिनमध्ये बसवली जाते आणि पुढील सिग्नलची माहिती चालकाला सुमारे सात किलोमीटर आधीच केबिनमधील स्क्रीनवर दिसते. त्यामुळे सिग्नल लाल असल्यास किंवा पुढे अडथळा असल्यास चालक वेळेआधीच वेग कमी करू शकतो. गरज पडल्यास ही यंत्रणा स्वयंचलितपणे ब्रेक लावून रेल्वे थांबवते.
advertisement
पहिल्यांदा हा प्रयोग कुठे सुरु करणार?
पुणे विभागात सुमारे 700 किमी मार्गांपैकी 250 किमीपेक्षा जास्त अंतरावर नॉन-सिग्नलिंग कवचची यशस्वी चाचणी घेण्यात आली आहे. पुणे-कोल्हापूर आणि दौंड-मनमाड या मार्गांवरही प्रणालीची चाचणी पूर्ण झाली आहे. देशभरातील 10 हजार इंजिनमध्ये कवच 4.0 बसवण्याचे काम सुरू असून 9 हजार किमी रेल्वेमार्गांवर हे तंत्रज्ञान सुरु केले जात आहे.
नेमका कसा होणार फायदा?
कवचमुळे समोरासमोर धडक, पाठीमागून धडक किंवा सिग्नल तोडण्याच्या घटना टळतील. एकाच ट्रॅकवर दोन गाड्या आल्यास ही प्रणाली आपोआप ब्रेक लावते. वेगमर्यादा ओलांडल्यास गाडीचा वेग कमी करते. रेल्वे फाटक उघडे असल्यास किंवा लूप लाईनवर वेग जास्त असल्यासही ही यंत्रणा चालकाला मदत करते. त्यामुळे प्रवास अधिक सुरक्षित, सुरळीत आणि नियंत्रित होणार आहे.