Fraud News: आधी ओळख, मग संबंध अन् शेवटी उच्चशिक्षित तरुणासोबत मोठा गेम; मॅट्रिमोनिअल साईटवर पुणेकरांसोबत होतोय भयंकर खेळ

फसवणुकीचा भयानक प्रकार

एका उच्चशिक्षित तरुणाला संकेतस्थळावरून तरुणीशी ओळख करणं महागात पडलं. ओळखीनंतर संबंध प्रस्थापित झाले आणि पुढे याच गोष्टीचा फायदा घेत तरुणीने त्याला बलात्काराची धमकी दिली. भीतीपोटी तरुणाने कर्ज काढून, बहिणीचे सोने गहाण ठेवून तब्बल ४३ लाख रुपये तिला दिले. अखेर मानसिक छळ असह्य झाल्याने तरुणाने पोलिसांत धाव घेतली. अशाच प्रकारे, परदेशातील 'सीईओ' किंवा 'डॉक्टर' असल्याचे सांगून अनेक महिलांनाही कोट्यवधींचा गंडा घातला जात आहे.

advertisement

हे भामटे बनावट प्रोफाईलद्वारे स्वतःला डॉक्टर, इंजिनिअर किंवा 'एनआरआय' असल्याचे भासवतात. त्यानंतर महागड्या गिफ्टचे आमिष, कस्टम ड्यूटीच्या नावाखाली वसुली किंवा 'डिजिटल अरेस्ट'ची भीती दाखवून पैसे उकळतात. आयटी क्षेत्रातील तरुण आणि घटस्फोटित महिला यांना हे गुन्हेगार प्रामुख्याने लक्ष्य करत आहेत.

पोलिसांचे आवाहन

सायबर सेलने नागरिकांना सावध राहण्याचे आवाहन केले आहे. अनोळखी व्यक्तीशी बोलताना आर्थिक व्यवहार करणे टाळावे. संशयास्पद पैशांची मागणी झाल्यास तत्काळ १९३० या हेल्पलाईनवर किंवा www.cybercrime.gov.in वर तक्रार करावी. जोडीदार निवडताना घाई न करता कुटुंबाची आणि संबंधित व्यक्तीच्या कामाची खात्री करून घेणे आता काळाची गरज बनली आहे.