TRENDING:
रुपल बाफना यांना लहानपणापासूनच क्रिकेटची आवड होती. त्यांचे माहेर नारायणगाव येथे असून त्या एकत्र कुटुंबात वाढल्या. घरात भावा सोबत खेळताना त्यांची क्रिकेटची आवड अधिक वाढत गेली. मात्र त्या काळात मुलींनी क्रिकेट खेळण्यास फारसे प्रोत्साहन देणारे वातावरण नव्हते. तरीही त्यांनी आपली आवड जपली.
लग्नानंतरही त्यांची क्रीडाक्षेत्राशी नाळ कायम राहिली. साधडी गावात आयोजित करण्यात आलेल्या ‘स्पोर्ट्स डे’ मध्ये त्यांनी 400 मीटर आणि 100 मीटर धावण्याच्या स्पर्धेत भाग घेतला आणि पहिला क्रमांक पटकावला. त्यावेळी आयुष्यातील पहिली ट्रॉफी मिळाली. या ट्रॉफीने आयुष्यात नवा आत्मविश्वास निर्माण केला आणि त्यानंतर क्रिकेट खेळण्याचा निर्णय अधिक ठाम केला, असे रुपल सांगतात.
advertisement
कामावर जायला उशीर झाला अन् आयुष्य बदललं! शेतमजूर महिला झाली उद्योजक, आता लाखात उलाढाल!
एका मैत्रिणीने रुपल यांना जैन सोशल ग्रुपमध्ये महिला क्रिकेट सामने आयोजित केले जात असल्याची माहिती दिली. त्यानंतर 2017 मध्ये त्यांनी जैन सोशल प्लॅटिनियम ग्रुपमध्ये सहभाग घेतला आणि पहिल्यांदाच अधिकृत क्रिकेट सामना खेळला. विशेष म्हणजे पहिल्याच सामन्यात त्यांना बक्षीस मिळाले. याच क्षणापासून त्यांच्या क्रिकेट प्रवासाची खरी सुरुवात झाली.
गेल्या आठ वर्षांत रुपल बाफना यांनी तब्बल 250 हून अधिक सामने खेळले आहेत. या कालावधीत त्यांनी 100 पेक्षा जास्त ट्रॉफी जिंकल्या आहेत. तसेच त्यांनी दोन आंतरराष्ट्रीय सामनेही खेळले आहेत. पुणे, मुंबई, कोलकाता आणि राजस्थान अशा विविध शहरांमध्ये जाऊन त्यांनी क्रिकेट सामने खेळले आहेत.
घरची जबाबदारी सांभाळत क्रिकेट खेळणे सोपे नव्हते. मात्र त्यांच्या कुटुंबाने त्यांना मोठा आधार दिला. त्यांच्या सासूबाईंचा आवडता खेळ क्रिकेट असल्यामुळे त्यांनी रुपल यांना नेहमी प्रोत्साहन दिले. तसेच मुलांची जबाबदारी सांभाळण्यात त्यांच्या पतीनेही त्यांना चांगली साथ दिली. त्यामुळे घर आणि क्रिकेट यामध्ये समतोल राखत आपला प्रवास यशस्वीपणे सुरू ठेवला.
रुपल बाफना सांगतात की, आपल्याला आवडणारा खेळ खेळायला मिळतो, हीच सर्वात मोठी गोष्ट आहे. कुटुंबाचा पाठिंबा असल्यामुळे मला पुढे जाण्याची प्रेरणा मिळाली. माझी मुलेही मला नेहमी प्रोत्साहन देतात. त्यांनी सांगितले की, त्यांच्या वडिलांचा स्वभाव खूप शिस्तप्रिय होता. ते नारायणगावचे सरपंच होते. त्यामुळे घरात शिस्तीचे वातावरण होते. मात्र त्यांनी आपली आवड जपत धाडसाने प्रयत्न केले आणि त्यातूनच आज त्यांची वेगळी ओळख निर्माण झाली आहे.
आज अनेक महिला त्यांच्याकडून प्रेरणा घेत आहेत. घरकाम, कुटुंब आणि आवड यामध्ये योग्य समतोल साधत रुपल बाफना यांनी क्रिकेट क्षेत्रात स्वतःची ओळख निर्माण केली आहे. त्यांचा हा प्रवास अनेक महिलांसाठी प्रेरणादायी ठरत आहे.