Fraud News: आधी ओळख, मग संबंध अन् शेवटी उच्चशिक्षित तरुणासोबत मोठा गेम; मॅट्रिमोनिअल साईटवर पुणेकरांसोबत होतोय भयंकर खेळ

एका उच्चशिक्षित तरुणाला संकेतस्थळावरून तरुणीशी ओळख करणं महागात पडलं. ओळखीनंतर संबंध प्रस्थापित झाले आणि पुढे याच गोष्टीचा फायदा घेत तरुणीने त्याला बलात्काराची धमकी दिली. भीतीपोटी तरुणाने कर्ज काढून, बहिणीचे सोने गहाण ठेवून तब्बल ४३ लाख रुपये तिला दिले. अखेर मानसिक छळ असह्य झाल्याने तरुणाने पोलिसांत धाव घेतली. अशाच प्रकारे, परदेशातील 'सीईओ' किंवा 'डॉक्टर' असल्याचे सांगून अनेक महिलांनाही कोट्यवधींचा गंडा घातला जात आहे.

सायबर सेलने नागरिकांना सावध राहण्याचे आवाहन केले आहे. अनोळखी व्यक्तीशी बोलताना आर्थिक व्यवहार करणे टाळावे. संशयास्पद पैशांची मागणी झाल्यास तत्काळ १९३० या हेल्पलाईनवर किंवा www.cybercrime.gov.in वर तक्रार करावी. जोडीदार निवडताना घाई न करता कुटुंबाची आणि संबंधित व्यक्तीच्या कामाची खात्री करून घेणे आता काळाची गरज बनली आहे.