पुण्यात छतावर पाण्याची टाकी बसवायला चढलेला तरुण परतलाच नाही, आईला मोठा धक्का, पोलिसात धाव, काय घडलं?

नेमकी घटना काय?

मिळालेल्या माहितीनुसार, एरंडवणे परिसरातील गुलमोहर अपार्टमेंटच्या आवारात एक पॅथॉलॉजी लॅबोरेटरी आहे. या लॅबोरेटरीला पाणीपुरवठा करण्यासाठी छतावर नवीन प्लॅस्टिक टाकी बसवण्याचे काम शुक्रवारी (दि. २० मार्च) दुपारी सुरू होते. राहुल श्रीकांत सतनामी (वय २१, रा. धायरी, सिंहगड रस्ता) हा तरुण हे काम करत होता. टाकीला आधार देण्यासाठी लोखंडी गजाचा वापर करण्यात आला होता. मात्र, काम सुरू असताना अचानक हा गज तुटला आणि अवजड टाकी थेट राहुलच्या अंगावर कोसळली.

advertisement

टाकी कोसळल्याने राहुलला गंभीर अंतर्गत दुखापत झाली. त्याला तातडीने जवळच्या खासगी रुग्णालयात दाखल करण्यात आले, मात्र उपचारादरम्यान त्याचा मृत्यू झाला. राहुल अवघ्या २१ वर्षांचा असल्याने परिसरात हळहळ व्यक्त होत आहे. याबाबत राहुलची आई सीमा सतनामी (४४) यांनी डेक्कन पोलीस ठाण्यात फिर्याद दिली असून, कामाच्या ठिकाणी सुरक्षिततेची काळजी न घेतल्याने हा अपघात झाल्याचा आरोप केला आहे.

डेक्कन पोलिसांनी याप्रकरणी दुर्घटनेस जबाबदार ठरल्याप्रकरणी संबंधित व्यक्तीवर गुन्हा नोंदवला आहे. या कामात सुरक्षिततेचे नियम पाळले होते का? आणि वापरलेला लोखंडी गज निकृष्ट दर्जाचा होता का? याचा तपास पोलीस उपनिरीक्षक भोसले करत आहेत.