अशाच एका धक्कादायक प्रकरणात मोबिक्विक अ‍ॅपमध्ये आलेल्या तांत्रिक बगचा फायदा घेत जवळपास 40 कोटी रुपयांची मोठी फसवणूक करण्यात आली. या प्रकरणानंतर फिनटेक प्लॅटफॉर्म्सची सुरक्षा आणि त्यांचं नियमन यावर गंभीर प्रश्न निर्माण झालं आहेत.
गुरुग्राम पोलिसांच्या माहितीनुसार, मोबिक्विक अ‍ॅपमधील बगमुळे ग्राहकांकडे पुरेसा बॅलन्स नसतानाही किंवा चुकीचा पासवर्ड टाकल्यानंतरही व्यवहार ‘यशस्वी’ नोंदवले जात होते. या त्रुटीचा फायदा घेत आरोपींनी आपल्या बँक खात्यांमध्ये कोट्यवधी रुपये ट्रान्सफर केले.
advertisement
या प्रकरणी पोलिसांनी सहा जणांना अटक केली असून, त्यांच्या जवळपास 2,500 बँक खाती फ्रीज करण्यात आली आहेत. आतापर्यंत जवळपास 8 कोटी रुपये परत मिळवण्यात यश आलं आहे. अटक करण्यात आलेल्या आरोपींची नावे रेहान, मोहम्मद शकील, वकार यूनिस, वसीम अकरम, मोहम्मद आमिर आणि मोहम्मद अंसार अशी आहेत.
मोबिक्विक घोटाळा हा पहिलाच प्रकार नाही. यापूर्वी ऑगस्ट महिन्यात पॉलिसीबाजार इन्शुरन्स ब्रोकर्स कंपनीच्या नावाने बनावट कागदपत्रं तयार करून ग्राहकांना फसवल्याची घटना समोर आली होती. त्या प्रकरणात 11 ग्राहकांची एकूण 2.08 लाख रुपयांची फसवणूक करण्यात आली होती.
तज्ज्ञांच्या मते, फिनटेक प्लॅटफॉर्म्सवर वारंवार होणाऱ्या अशा तांत्रिक त्रुटी आणि फसवणूक प्रकरणांमुळे ग्राहकांचा विश्वास कमी होऊ शकतो. त्यामुळे अशा अनियमिततेची चौकशी नियामक संस्था, तसेच ईडी आणि सीबीआयसारख्या सरकारी एजन्सींनी काटेकोरपणे करणं गरजेचं आहे.
सध्या पोलिसांनी भारतीय दंड संहिता (IPC) अंतर्गत फसवणुकीसंदर्भातील कलमांखाली गुन्हा दाखल केला आहे. तपास अजून सुरू असून, या प्रकरणात आणखी लोकांचा सहभाग असू शकतो, असं पोलिसांनी सांगितलं. कंपनीनेही पूर्ण नुकसान भरून काढण्यासाठी कायदेशीर पावलं उचलण्यास सुरुवात केली आहे.