TRENDING:
१०० डॉलरचा आकडा आणि तुमच्या खिशाला पडणारं भोकं
मूडीजच्या अहवालानुसार, जर कच्च्या तेलाने १०० डॉलर प्रति बॅरलचा टप्पा ओलांडला आणि तो तिथेच टिकून राहिला, तर जगात महागाईचा असा भडका उडेल जो आटोक्यात आणणं अशक्य होईल. तेल महागलं की फक्त पेट्रोल-डिझेल महाग होतं असं नाही; तर ट्रकमध्ये येणारा भाजीपाला, दुकानातलं किराणा सामान आणि साधी सुईसुद्धा महाग होते. थोडक्यात, तुमची 'खरेदी करण्याची ताकद' हे युद्ध गिळून टाकेल.
advertisement
EMI स्वस्त होण्याची स्वप्नं विसरा!
तुम्ही जर गृहकर्ज किंवा कार लोनचा हप्ता कमी होण्याची वाट पाहत असाल, तर हा रिपोर्ट तुमच्यासाठी वाईट बातमी आहे. मूडीज म्हणतंय की, जोपर्यंत तेलामुळे महागाई वाढलेली असेल, तोपर्यंत बँका व्याजाचे दर कमी करणार नाहीत. उलट, तुमची आर्थिक ओढाताण वाढवण्यासाठी हे दर अजून प्रदीर्घ काळ 'चढेच' ठेवले जातील. म्हणजे एकीकडे महागाई वाढलेली आणि दुसरीकडे कर्जाचा डोंगर, अशी दुहेरी कात्री सामान्यांसाठी तयार केली जात आहे.
आशिया आणि युरोपला सर्वात मोठा फटका!
या युद्धाचा सर्वात जास्त फटका कोणाला बसेल? तर आपल्यासारख्या देशांना, जे तेलासाठी दुसऱ्यांवर अवलंबून आहेत. आशियाई देशांची अर्थव्यवस्था तेलावर चालते. जर आखाती देशांतून होणारा पुरवठा विस्कळीत झाला, तर जगात ऊर्जेचा हाहाकार माजेल. रस्ते ओस पडतील आणि कारखाने बंद पडण्याची भीती निर्माण होईल.
आर्थिक मंदीची नांदी!
मूडीजच्या या इशाऱ्याचा सरळ अर्थ हाच आहे की, हे युद्ध जितकं लांबेल तितकं जग मंदीच्या गर्तेत जाईल. केवळ ऊर्जा सुरक्षाच नाही, तर जागतिक विकास दरालाही (GDP) मोठी खीळ बसेल. त्यामुळे तेहरानमध्ये पडणारा प्रत्येक बॉम्ब हा तुमच्या-माझ्या बँक बॅलेन्सवर पडणारा घाव आहे, असं समजायला हरकत नाही.