इराणची राजधानी तेहरान इथल्या मेहराबाद आंतरराष्ट्रीय विमानतळावरून सेपहान एअरलाइन्सची फ्लाइट 5915 इराणमधल्या दक्षिण खोरासान प्रांतातल्या तबास शहराकडे निघाली होती. ही देशांतर्गत फ्लाइट होती. 10 ऑगस्ट 2014 रोजी उड्डाणानंतर अवघ्या काही मिनिटांत हे विमान कोसळलं आणि क्रॅश झालं. टेक ऑफ करताना उजव्या इंजिनमध्ये बिघाड झाल्यामुळे हा अपघात घडल्याचं इराणच्या नागरी उड्डाण संघटनेने म्हटलं होतं.
advertisement
क्रू मेंबर्स आणि पायलटला इंजिनमध्ये बिघाड झाल्याचे समजल्यानंतर आपत्कालीन लँडिंग करता आलं नाही. हेदेखील अपघाताचं एक कारण होतं. दिशाभूल करणाऱ्या विमान उड्डाण पुस्तिकेलादेखील (AFM) तपासकर्त्यांनी दोष दिला. उड्डाणाच्या वेळी विमानाचं वजन 190 किलोने जास्त होतं. विमानातलं इंधन गरजेपेक्षा 500 किलोने जास्त होतं. ताशी 224 किमी वेगाने उड्डाण करण्याऐवजी विमानाने ताशी 219 किमी वेगाने उड्डाण केलं होतं. विमानाची उंची अचानक एवढी कमी झाली, की पायलट्सना काहीही करता आलं नाही.
सेपहानच्या फ्लाइट 5915 ने 10 ऑगस्ट 2014 रोजी सकाळी 9 वाजून 22 मिनिटांनी उड्डाण केलं होतं. वळणाच्या अवघ्या दोन सेकंद आधी विमानाचं उजवं इंजिन निकामी झालं. क्रूने ताबडतोब आणीबाणी घोषित केली आणि ताबडतोब डावीकडे वळून विमानतळावर परत जाण्याचा प्रयत्न केला. को-पायलट एटीसी अधिकाऱ्यांना इंजिनच्या स्थितीची माहिती देत राहिला. तेवढ्यात विमान अचानक थांबलं आणि वेगाने खाली येऊ लागलं. पश्चिम तेहरानमधल्या मिना ग्लास बुलेवार्डजवळच्या निवासी भागात हे विमान कोसळलं.
ऑइल टँकच्या तारा तुटल्याने विमानाला आग लागली. इंजिन आणि पंख विमानापासून वेगळे झाले. त्यानंतर विमान बुलेवार्डच्या काँक्रीट भिंतीवर आदळलं आणि स्फोट झाला. विमानतळावरचं आपत्कालीन पथक घटनास्थळी गेलं; मात्र गैरसमज आणि गैरव्यवस्थापनामुळे बचाव पथक वेळेवर पोहोचू शकलं नाही. विमानाच्या ढिगाऱ्याखालून किमान 11 प्रवाशांना जिवंत बाहेर काढण्यात आलं.