'देवा मला माफ कर, मुलांनो आईची काळजी घ्या', तरुणाची रेल्वेसमोर उडी, VIDEO मध्ये धक्कादायक कारण

ही घटना काल शुक्रवारी दुपारी 12 वाजेच्या सुमारास छत्रपती संभाजी महाराज तलावाजवळील रेल्वे पुलाच्या परिसरात घडली. जुबेर मशाक शेख (वय 43, रा. राहुल गांधी झोपडपट्टी, सध्या शास्त्री नगर) असं आत्महत्या केलेल्या व्यक्तीचं नाव आहे. जुबेरनं आत्महत्येपूर्वी 'मला माफ कर देवा' असं स्टेटसला ठेवलं होतं.

जुबेर यांनी आत्महत्या करण्यापूर्वी एक व्हिडिओ बनवला होता, त्यात त्यांनी आपल्या मुलांना, 'तुम्ही चांगले राहा, चांगलं शिक्षण घ्या, आईची काळजी घ्या', असं भावनिक आवाहन केलं होतं. यानंतर जुबेर यांनी आपला मोबाइल घरात ठेवून ते निघून गेले. त्यानंतर ते पुन्हा परतलेच नाहीत. काल शुक्रवारी, दुपारी 12 वाजेच्या सुमारास त्यांच्या मृत्यूची बातमी कळाली.

मोबाईलमध्ये शूट केलेल्या व्हिडीओमध्ये मयत जुबेर यांनी आपल्यावर झालेलं कर्ज आणि त्यातून आलेल्या तणावातून आत्महत्या करत असल्याचं म्हटलं आहे. त्यांनी कोणत्याही सावकाराचं नाव घेतलं नाही. मात्र अनेकांकडून कर्ज घेतल्याचं त्यांनी व्हिडीओत सांगितलं आहे. या प्रकारानंतर जुबेर यांचे नातेवाईक आक्रमक झाले. जोपर्यंत आरोपी सावकारांवर कारवाई होत नाही, तोपर्यंत मृतदेह ताब्यात घेणार नाही, असा पवित्रा घेतला. मात्र पोलिसांनी समजूत घातल्यानंतर नातेवाईकांनी मृतदेह ताब्यात घेतला. रात्री उशिरा जुबेर यांच्यावर अंत्यसंस्कार करण्यात आले.

मी जुबेर शेख, मला जुगाराचा नाद लागला. मी अनेक ठिकाणाहून कर्ज घेतलं. मला काय करावं हे कळत नाहीये. मी आत्महत्या करत आहे. यासाठी कोणीही जबाबदार नाही. मी कोणत्याही सावकारांचे नाव घेत नाही. सावकारांनी कुटुंबीयांना त्रास देऊ नये. मी त्यांचे खूप व्याज भरले आहे. सावकारांच्या मनात दया यावी, त्यांनी माझ्या कुटुंबीयांना त्रास देऊ नये. ज्यांनी उधार दिले आहेत, त्यांना विनंती आहे की, मी काही जणांना पैसे दिले आहेत. ते पुढील 2 ते 3 महिन्यात माझ्या आईच्या हातात पैसे देतील. काही जणांकडे माझे पैसे दिले आहेत, असे सांगून काही जणांची नावं त्यांनी या व्हिडिओमध्ये घेतली आहेत.