'30 मिनिटात पैसे भरा नाहीतर...' ऑनलाईन फ्रॉडमधून थोडक्यात वाचला चिन्मय मांडलेकर, सांगितला धक्कादायक अनुभव

चिन्मयच्या पत्नी नेहा मांडलेकर हिला गॅस बिल भरण्याच्या बहाण्याने खोटा फोन आला होता. पण वेळीच सतर्क राहिल्यामुळे त्यांचे आर्थिक नुकसान झाले नाही.  चिन्मयच्या पत्नीला गॅस कनेक्शनचं बिल भरलं नसल्याचा फोन आला. 'जानेवारी महिन्याचं 1068 रुपये बिल भरले नाहीत, बिल अपडेट दिसत नाही, व्हाट्स अपला पाठवलेली apk फाईल डाउनलोड करा' असं फोनवर सांगण्यात आलं.  जर 30 मिनिटात बिल भरलं नाही तर आमचे लोक येऊन कनेक्शन कट करतील असं त्यांनी सांगितलं.

( BMC Tax: केबल टीव्ही ते मल्टिप्लेक्स, तुमचं महिन्याचं बजेट कोलमडणार? बीएमसीचा मोठा निर्णय )

पण हा फोन फसवणूकीचा असल्याचा प्रकार नेहा यांच्या वेळीच लक्षात आला आणि त्यांनी समोरच्याला बोलण्यात गुंतवून ठेवले. मला कुठलाही मेसेज आला नाही असं सांगितलं तिनं सांगितलं. जे कनेक्शन कट करायला लोकं येणार आहेत त्यांना अगोदर मला भेटायला सांगा असंही त्यांनी सांगितलं. त्यांच्या या बोलवण्यावरून समोरचा व्यक्ती चाचपडला आणि त्याने फोन कट केला.

असा धक्कादायक प्रकार इतरांसोबत घडू नयेत म्हणून चिन्मयने या फ्रॉडचा व्हिडीओ शेअर केला आहे. त्याने पोस्टमध्ये लिहिलंय, "माझ्या पत्नीला MGL चा प्रतिनिधी असल्याचे भासवून एका फसवणूक करणाऱ्याने फोन केला. मित्रांनो, चोर लुटायला बसले आहेत… सतर्क राहा. सुरक्षित राहा. फसवणूक करणारे अनेकदा विश्वासार्ह सेवा पुरवठादार असल्याचे भासवतात. बनावट लिंक, APK डाउनलोड, तसेच व्हॉट्सअ‍ॅप किंवा एसएमएसद्वारे ते लोकांना जाळ्यात ओढण्याचा प्रयत्न करतात. कोणतीही कृती करण्यापूर्वी माहितीची खातरजमा करा आणि सजग राहा. MGL कधीही संदेश किंवा फोनद्वारे तुमचे OTP, बँक तपशील किंवा पासवर्ड विचारत नाही."