Dhurandhar 2 चं वादळही फिकं! झाली 'राजा शिवाजी'ची एंट्री, घुमला 'हर हर महादेव'चा नारा

धुरंधर 2 पाहायला गेलेल्या प्रेक्षकांसाठी एक जबरदस्त असं सरप्राईझ मिळालं आहे. फिल्म रिलीजसोबत एका फिल्मचा टिझर प्रेक्षकांना पाहायला मिळाला. ही फिल्म आहे 'राजा शिवाजी'. छत्रपती शिवाजी महाराजांच्या पराक्रमाची, स्वाभिमानाची आणि स्वराज्याच्या स्थापनेच्या प्रवासाची झलक. एका महान योद्धाची गाथा आणि स्वराज्य स्थापनेचा संघर्ष टीझरमध्ये पाहायला मिळतो आहे.

रितेश देशमुख शिवाजी महाराजांच्या भूमिकेत आहे. चित्रपटाचं दिग्दर्शन स्वत: रितेशने केलं आहे. जेनिलिया देशमुख आणि ज्योती देशपांडे यांनी चित्रपटाची निर्मिती केली आहे. या चित्रपटाच्या संगीताची जबाबदारी अजय- अतुल यांच्या खांद्यावर आहे. जिओ स्टुडिओज प्रस्तुत आणि मुंबई फिल्मच्या बॅनरखाली चित्रपट तयार झालेला आहे.

महाराष्ट्र दिनाचं औचित्य साधून 'राजा शिवाजी' चित्रपट 1 मे 2026 रोजी संपूर्ण देशभरात रिलीज होणार आहे. मराठी, हिंदी आणि तेलुगु या तीन भाषांमध्ये बॉक्स ऑफिसवर रिलीज होणार आहे.  रितेश देशमुखला पहिल्यांदाच 'राजा शिवाजी' चित्रपटामध्ये छत्रपती शिवाजी महाराजांच्या भूमिकेत पाहण्यासाठी चाहते कमालीचे उत्सुक आहेत.