मित्रांसोबत जेवणाचा बेत ठरला शेवटचा! खेडमधील अपघातात तरुणाचा दुर्दैवी अंत

अद्वैत गीते हा शनिवारी रात्री ११ च्या सुमारास आपल्या एका मित्रासह दुचाकीवरून मुंबई-गोवा महामार्गावरून कळंबणीच्या दिशेने जात होता. भरणे-शिंदेवाडी परिसरात आल्यावर अचानक दुचाकीवरील ताबा सुटला आणि गाडी महामार्गावर जोरात घसरली. दुचाकीवरून फेकले गेलेला अद्वैत रस्त्याच्या मधोमध असलेल्या दुभाजकावर जाऊन आदळला. त्याच्या डोक्याला गंभीर दुखापत झाल्याने त्याचा जागीच प्राण गेला.

अद्वैत हा नवभारत हायस्कूलचे शिक्षक प्रवीण गीते यांचा मुलगा होता. त्यांचे मूळ गाव खेड तालुक्यातील तिसंगी आहे. अद्वैत आपल्या मित्रांसमवेत रात्रीच्या जेवणासाठी कळंबणीला जात असताना हा अपघात झाला. या घटनेची माहिती मिळताच भरणे आणि तिसंगी परिसरातील नातेवाईक, मित्रपरिवार आणि शिक्षकांनी घटनास्थळी मोठी गर्दी केली होती.

या अपघातात दुचाकीवर मागे बसलेला अद्वैतचा मित्रही गंभीर जखमी झाला आहे. त्याला तात्काळ कळंबणी येथील उपजिल्हा रुग्णालयात दाखल करण्यात आले असून, त्याच्यावर उपचार सुरू आहेत. याप्रकरणी खेड पोलीस ठाण्यात अपघाताची नोंद करण्याची प्रक्रिया रात्री उशिरापर्यंत सुरू होती.