Cervical Cancer : दुर्लक्ष करणं जीवावर बेतेल! महिलांमध्ये वेगाने वाढतोय ‘या’ कॅन्सरचा धोका, गर्भाशयाच्या मुखावर होतो थेट परिणाम

Cervical Cancer : भारतात दरवर्षी सुमारे 1.25 लाख महिलांना गर्भाशयाच्या मुखाचा कर्करोग होतो आणि त्यातले अर्ध्याहून अधिक बळी जातात. दुर्दैव म्हणजे, 70 टक्के प्रकरणे ही आजाराचा तिसरा टप्पा गाठल्यानंतरच समोर येतात. ग्रामीण भागात तपासणी सुविधा कमी असल्याने हे प्रमाण अधिक आहे. समाजाने महिलांच्या आरोग्याबाबत अधिक जागरूक होण्याची गरज आहे. महिलांनी आपल्या आरोग्याकडे दुर्लक्ष न करता 'नियमित तपासणी, लसीकरण व जीवनशैलीत बदल' हे त्रिसूत्र अंगीकारण्याची आज गरज आहे. वेळेवर घेतलेली काळजी कर्करोगावर सर्वांत प्रभावी इलाज आहे! गर्भाशयाच्या मुखाचा कर्करोग (Cervical Cancer) हा भारतातील महिलांमध्ये आढळणाऱ्या कर्करोगांपैकी दुसऱ्या क्रमांकावर आहे. वर्षानुवर्षे दुर्लक्षित राहिलेला; पण पूर्णतः प्रतिबंध करता येणारा हा आजार अजूनही महिलांच्या जीवावर बेतत आहे. लवकर निदान आणि योग्य उपचार झाल्यास या आजारावर सहज मात करता येते; मात्र याची लक्षणे सुरुवातीस दिसत नाहीत, हेच या आजाराचे मुख्य धोकादायक वैशिष्ट्य आहे. ज्यामुळे कर्करोग होऊ शकतो, या विषाणूचे नाव 'ह्युमन पेपिलोमा व्हायरस' असे आहे. 'एचपीव्ही'चे जवळपास 200 प्रकार आहेत. त्यातील जवळपास 40 प्रकार जननेंद्रियांजवळ दिसतात. त्यातील काहींमुळे चामखीळसारखे प्रकार होऊ शकतात; पण ते गंभीर प्रकार आहेत, ज्यामुळे गर्भाशयाचा कॅन्सर होऊ शकतो.