Edamame Benefits: प्रोटिन्सचं पॉवर हाऊस आहे ‘ही’ भाजी, कॅन्सर सारखे गंभीर आजारही पळतील दूर

मुंबई : घेवडा ही एक आरोग्यदायी भाजी आहे. घेवड्याचे दाणे हे सोयाबीनच्या आकाराचे मात्र रंगाने हिरवे असतात. त्यामुळे या भाजीला ग्रीन सोयाबीन किंवा हिरवं सोयाबीन असंही म्हणतात. ग्रामीण भाषेत ही भाजी वालपापडी या नावाने ओळखली जाते. घेवडा हा प्रथिनांचा खजिना आहे असं म्हटलं तर चुकीचं ठरणार नाही. घेवड्यात प्रथिनांव्यतिरिक्त फायबर, जीवनसत्त्वे, कॅल्शियम, लोह, फोलेट, मॅग्नेशियम, पोटॅशियम आणि फॉस्फरस सारखी महत्त्वपूर्ण खनिजं आढळून येतात. ज्यामुळे आरोग्याला विविध फायदे होऊन वेगवेगळ्या आजारांना दूर ठेवता येतं. घेवड्यात अँटिऑक्सिडंट्स देखील असतात ज्यामुळे शरीरातली जळजळ कमी होऊन रोगप्रतिकारक शक्ती वाढायला मदत होते.शंभर ग्रॅम घेवड्यात जवळपास 11 ग्रॅम प्रोटीन्स असतात. यावरून त्यांच्या असलेल्या प्रथिनांच्या समृद्धीची कल्पना येईल. घेवड्यात असलेल्या पोटॅशियममुळे हृदविकारांचा धोका टाळता येतो. याशिवाय हिवाळ्यात होणाऱ्या सांधेदुखीच्या त्रासावर हिवाळ्यात घेवड्याची भाजी खाणं फायद्याचं ठरतं.