भारतात जंक फूड आहे पिझ्झा, मग इटलीत लोक तो दररोज खाऊनही हेल्दी कसे राहतात?

पिझ्झा म्हणजे त्यावर कांदा, टोमॅटो, शिमला मिरजी, कॉर्न, मशरूम अशा वेगवेगळ्या प्रकारच्या भाज्या असतात. तरी भारतात पिझ्झा हा जंक फूडच्या यादीत आहे. जंक फूड म्हणजे असे पदार्थ जे खाल्ल्याने आरोग्याच्या समस्या उद्धभवतात. लठ्ठपणा बळावतो. त्यामुळे भारतात दररोज पिझ्झा खाणाऱ्या लोकांना समस्या होतात. पण भारतातील लोकांना नुकसान पोहोचवणारा पिझ्झा खाऊन इटलीतील लोकांना काहीच कसं होत नाही? गट हेल्थ कोच डिम्पल जांगडा यांनी एका वेबसाईटला याबाबत माहिती दिली आहे.

याचं कारण म्हणजे पिझ्झा बनवण्याची पद्धत. इटलीत पिझ्झा बनवण्याची पद्धत भारताच्या पद्धतीपेक्षा वेगळी आहे. भारतात मिळणारा पिझ्झा इटलीतील पिझ्झासारखा नसतो. आता दोन्ही देशांतील पिझ्झामध्ये नेमका फरक काय?

पिझ्झा बेस : इटलीत पिझ्झा बेस धान्यांच्या पिठापासून बनवतात आणि दररोज ताजं हातांनी बनवला जातो. जे आतड्यांतील मायक्रोबायोमसाठी चांगलं असतं. तर भारतात पिझ्झा बेस पाकिटात मिळतात. जे मैद्यापाून बनलेले असतात. मैदात कोणतेच पोषक घटक नसतात तसंच या कित्येक केमिकल्स आणि ब्लीचिंग एजेंट्स मिसळले जातात.

चीझचा वापर : इटलीत पिझ्झावर टाकलं जाणारं चीझ घरी बनवलेलं ताजं चीझ असतं. भारतात बहुधा प्रोसेस्ड चीझचा वापर होतो. ज्यात प्रिझर्व्हेटिव्स मिक्स केले जातात. हे प्रिझर्व्हेटिव्ह शरीरात सूज आणि लठ्ठपणा वाढवतात.

टॉपिंग्स आणि सॉस : इटलीतील पिझ्झामध्ये ऑलिव्ह ऑईल, ओरिगॅनो आणि चिलीफ्लेक्स वापरतात जे पचनासाठी फायदेशीर आहे. भारतात पिझ्झा बेसवर मेयोनीज, बटर, पॅक्ड सॉस टाकले जातात जे आरोग्यासाठी चांगले नाहीत.

लाइफस्टाईल : इटालियन लोक शारीरिकरित्या सक्रिट असतात. पण आपण पिझ्झा खाल्ल्यानंतर निष्क्रिय होतो, हे लठ्ठपणाचं एक कारण आहे.