Kelfulachi Bhaji : आरोग्यासाठी फायदेशीर, पारंपरिक केळफुलाची भाजी करा घरीच, रेसिपीचा Video

दोन्ही हातांना तसेच टोकदार सुरीला तेल लावूनच केळीचा कोका सोलण्यासाठी घ्यावा. आमसुली रंगाची सालं काढून आतमध्ये असलेले केळ्यांचे गुच्छ वेगळे करून घ्यावेत. कोक्याचा पांढरा भाग दिसेपर्यंत सोलण्याची गरज नाही. वरचे फक्त तीन-चार गुच्छ काढून त्यातील लहान-लहान केळफुले सोलून घ्यावीत. बाकी संपूर्ण कोक्यास, तेल लावलेल्या धारदार सुरीने उभे-आडवे लहान-लहान काप टाकून चिरून घ्या.

चिरलेले केळफूल काळे पडू नये म्हणून बारीक होईल तसे लगेच मोठ्या भांड्यात हळदीच्या पाण्यात भिजत ठेवावे. दहा मिनिटानंतर स्वच्छ लाकडी काठीच्या मदतीने केळफुलाचा चिकटपणा बाजूला काढावा. काही वेळ काठी पाण्यामध्ये एकाच दिशेने गोल-गोल फिरवल्यास केळफुलाचा चिकट, काळपट राप काठीवरती जमा होईल आणि भाजी स्वच्छ होईल.

यानंतर भाजी पाण्यातून वेगळी करून भांड्यात काढून घ्या. कढईत तेल गरम करावे. मोहरी, कडीपत्ता, ओल्या खोबऱ्याचे वाटण, हिरव्या मिरचीचा ठेचा घालून चरचरीत फोडणी द्यावी. भाजलेल्या वाटणात चिरलेली भाजी टाकून घ्या. चवीनुसार मीठ आणि थोडेसे पाणी टाकून भाजी शिजवून घ्यावी.अनेक पोषक तत्वांचा खजिना असणाऱ्या केळफुलाची भाजी बनवण्याच्या अनेक पद्धतींपैकी ही अगदी सोपी पद्धत ठरते.

केळफुलाचा समावेश आपल्या आहारात नियमित किंवा वरचेवर ठेवला तर त्याचा उपयोग शारीरिक आरोग्यासोबतच मानसिक आरोग्य सुधारण्यासही होत असल्याचे आरोग्य तज्ञ सांगतात. त्यामुळे आपल्या आरोग्याची काळजी घेण्यासाठी केळफुलाची पारंपारिक रेसिपी नक्की बनवून खा.