स्वयंपाक घराचा खर्च वाढला, मसाल्यांच्या दरात मोठी वाढ, कारण काय?

मसाल्यांच्या दरवाढीमागे अनेक कारणे असल्याचे व्यापारी सांगतात. यंदा लागवडीच्या काळात काही भागांत अतिवृष्टी झाली. त्यामुळे जिरे, धणे आणि इतर मसाला पिकांचे मोठे नुकसान झाले. पिकांचे उत्पादन कमी झाल्याने बाजारात मसाल्यांची आवक घटली. पुरवठा कमी आणि मागणी जास्त असल्यामुळे मसाल्यांचे दर वाढले. तसेच उन्हाळ्याच्या दिवसांमध्ये मसाल्याला मागणी जास्त असते, याबरोबरच वाहतूक खर्च आणि साठवणुकीच्या खर्चातही वाढ झाल्याने त्याचा परिणाम बाजारभावावर झाला, ललित धोका यांनी म्हटले आहे.

सध्या लग्नसराईचा हंगाम सुरू असून विविध कार्यक्रमांमध्ये मोठ्या प्रमाणात मसाल्यांचा वापर केला जातो. त्याचबरोबर सणवार आणि रमजान महिन्यामुळेही स्वयंपाकात मसाल्यांचा वापर वाढतो. त्यामुळे बाजारात मसाल्यांची मागणी मोठ्या प्रमाणात वाढली आहे. मागणी वाढल्याने व्यापाऱ्यांनीही दर वाढवल्याचे दिसून येत आहे.

पूर्वी घराघरांत मिरची, धणे, जिरे यांसारखे मसाले वेगवेगळे आणून घरच्या घरी दळून वापरण्याची पद्धत होती. मात्र सध्या बदलत्या जीवनशैलीमुळे रेडीमेड मसाल्यांचा वापर वाढला आहे. बाजारात विविध कंपन्यांचे पॅकिंग मसाले उपलब्ध असून ग्राहकांकडून त्यांना मोठी मागणी आहे. तरीही अनेक कुटुंबांमध्ये अस्सल चव मिळण्यासाठी खडा मसाला खरेदी करून घरगुती पद्धतीने मसाला बनवण्याची परंपरा कायम आहे.

व्यापाऱ्यांच्या मते सध्या मसाल्यांचे दर वाढले असले तरी भविष्यात मोठी दरवाढ होण्याची शक्यता कमी आहे. कारण मसाल्यांचे उत्पादन भारतासह इतर काही देशांमध्ये मोठ्या प्रमाणात होते. केरळ, तामिळनाडू, कर्नाटक, मध्य प्रदेश, राजस्थान आणि गुजरात या राज्यांमध्ये मसाल्यांचे मोठ्या प्रमाणात उत्पादन होते. त्यामुळे आगामी काळात बाजारात पुरवठा वाढल्यास मसाल्यांचे दर स्थिर राहण्याची शक्यता व्यक्त केली जात आहे.