कॅप्टन खरातनंतर आता नांदेडचा महाराज गजाआड, महिलेवर अत्यचार; एक वर्षापासून सुरू होता धक्कादायक प्रकार

पवित्र तीर्थक्षेत्र असलेल्या नांदेड शहरात एका मठाच्या महाराजाकडून महिलेचे लैंगिक शोषण झाल्याचा धक्कादायक प्रकार उघडकीस आला आहे. शहरातील एका मठात वास्तव्यास असलेल्या 39 वर्षीय हरिगिरी दत्तगिरी महाराज याने एका 46 वर्षीय विधवा महिलेला लग्नाचे आमिष दाखवून तिच्यावर वारंवार अत्याचार केला. याप्रकरणी पीडित महिलेने धाडस दाखवून तक्रार दिल्यानंतर भाग्यनगर पोलिसांनी नराधम महाराजाला बेड्या ठोकल्या आहेत.

मिळालेल्या माहितीनुसार, पीडित महिला 46 वर्षांची असून ती विधवा आहे. हरिगिरी दत्तगिरी महाराज याने या महिलेशी जवळीक साधून तिला लग्नाचे स्वप्न दाखवले. जुलै 2025 पासून हा प्रकार सुरू होता. महाराजाच्या शब्दावर विश्वास ठेवून महिलेने लग्नासाठी संमती दर्शवली होती. मात्र, लग्नाचे आश्वासन देऊन महाराजांनी महिलेला आपल्या वासनेची शिकार बनवले. गेल्या काही महिन्यांत त्याने तीनवेळा महिलेवर अत्याचार केल्याचे तक्रारीत म्हटले आहे.

महिलेला जेव्हा आपली फसवणूक होत असल्याचे लक्षात आले, तेव्हा तिने तातडीने भाग्यनगर पोलीस ठाणे गाठले. पीडितेच्या जबाबानुसार पोलिसांनी हरिगिरी दत्तगिरी महाराजावर विविध कलमान्वये गुन्हा दाखल करून त्याला अटक केली आहे. नाशिकच्या कॅप्टन खरात प्रकरणाने आधीच 'भोंदू बाबां'चा विषय ऐरणीवर असताना, नांदेडमधील या घटनेने धार्मिक स्थळांच्या सुरक्षेचा आणि तिथल्या वर्तणुकीचा प्रश्न पुन्हा एकदा निर्माण झाला आहे.