Rain and Flood: सांगली कोल्हापूरच्या पुरस्थितीवरून सर्वपक्षीय नेत्यांची धावाधाव, अलमट्टीबाबत मोठा निर्णय होणार?

प्रत्येक पावसाळ्यात सांगली आणि कोल्हापूर जिल्ह्यातील पूराच्या पाण्याचा प्रश्न ऐरणीवर येतो. अशावेळी जिल्ह्यांतील पंचगंगा, कृष्णा या नद्यांना पूर येतो. परिस्थिती नियंत्रणात आणण्यासाठी कर्नाटक सरकारशी बोलणी करून  अलमट्टी धरणातील विसर्ग वाढवावा लागतो. अगदी तशाच प्रकारची परिस्थिती यंदा देखील पाहायला मिळत आहे. पुढील काळात पावसाचे प्रमाण असेच राहिल्यास सांगली आणि कोल्हापूर पुरामुळे वेठीस धरलं जावू शकतं. त्यामुळे अलमट्टी धरणातील पाण्याचा विसर्ग गरजेनुसार नियमित करण्याची गरज आहे. आता सांगली, कोल्हापूर जिल्ह्यातील नेतेमंडळींनी आतापासून धावाधाव सुरू केली आहे.

कोल्हापूर व सांगली जिल्ह्यातील संभाव्य महापुराच्या पार्श्वभूमीवर आज काँग्रेसचे आमदार सतेज पाटील यांनी कर्नाटकचे मुख्यमंत्री सिध्दरामय्या, उपमुख्यमंत्री डी.के.शिवकुमार यांची भेट घेतली. संबंधित विभागांना पाण्याचे तात्काळ नियमन करावे, अशा सूचना देण्याची मागणी त्यांच्याकडे पाटील यांनी केली. यावर तात्काळ उपाययोजना करण्याचे आश्वासन कर्नाटक सरकारने दिले आहे.

या संभाव्य पूरस्थितीवर बोलताना विशाल पाटील म्हणाले की, "बिहारला पुरस्थिती नियंत्रणासाठी बक्कळ निधी दिला जातो. तसा महाराष्ट्राला का मिळत नाही? अलमट्टी धरणाबाबत केंद्र सरकारने तात्काळ लक्ष घालून योग्य उपाययोजन कराव्यात" अशी मागणी खासदार विशाल पाटलांनी केली. काँग्रेसचे आमदार विशाल पाटील देखील संपूर्ण स्थितीवर लक्ष ठेवून आहेत.