Video: ये देवेंद्रsss..... मुख्यमंत्र्यांना अंगाखांद्यावर खेळवलेली महिला जेव्हा भरसभेत हाक मारते! नेते-अधिकारी स्तब्ध, नेमकं काय घडलं?

अमरावतीच्या धारणी येथील सभा आटोपून मुख्यमंत्री माघारी फिरत असताना एका महिलेने मुख्यमंत्री फडणवीस यांना मोठ्याने आवाज दिला. दस्तुरखुद्द मुख्यमंत्र्यांना देवेंद्र म्हणून हाक दिल्याने सगळे अधिकारी, कर्मचारी, सोबकचे नेतेही एकमेकांकडे पाहू लागले. मुख्यमंत्री फडणवीस यांनीही तत्काळ मागे वळून पाहिले. त्यावेळी शेजारी उभा राहिलेल्या महिलेने त्यांना नारळ शाल देऊन त्यांचे स्वागत केले. तसेच काही मिनिटांच्या भेटीत मेळघाटातील समस्यांकडे मुख्यमंत्र्यांचे लक्ष वेधण्याचा प्रयत्न केला.

माझे मूळ गाव धारणी आहे. मेळघाटात सामाजिक कार्यकर्ती म्हणून मी काम करते. एक सर्वसाधारण महिला आहे. मला त्यांना एवढेच सांगायचे होते की मेळघाटात रस्ता, नाले आणि पाण्याची समस्या सर्वात जास्त आहे. नागरिकांना याच तीन समस्या प्रामुख्याने भेडसावतात, हा समस्यांकडे लक्ष द्या, असे मी त्यांना सांगितले. देवेंद्रच्या बहिणी माझ्या वर्गात होत्या. आम्ही एकत्र शिकलोय. त्यांच्या काकू आमच्या मामी आहेत. लहानपणी मी देवेंद्रला अंगाखांद्यावर खेळवलं, असे महिलेने सांगितले.

माझ्या समस्या ऐकल्यानंतर रस्ता करून देतो आणि बाकीच्या समस्याही सोडवतो, असा शब्द मुख्यमंत्र्यांनी मला दिला, असेही महिलेने सांगितले. देवेंद्र फडणवीस यांचे मूळगाव चंद्रपूर जिल्ह्यातील मूल आहे आणि माझेही माहेर चंद्रपूरमधील मूल आहे. आमची ओळख होती, मी त्याला आवाज दिला म्हणूनच तो आला नाहीतर आला नसता, असेही मिश्किलपणे 'लाडकी बहीण' म्हणाली.

मुख्यमंत्र्यांचा हात घेऊन महिला आस्थावाईकपणे त्यांची चौकशी करीत होती. बालपणीच्या आठवणी सांगत होती. यादरम्यान मुख्यमंत्र्यांच्या अवतीभवती असलेल्या सुरक्षारक्षकांनी महिलेचा हात मागे सारण्याचा प्रयत्न केला. त्यावर मुख्यमंत्री फडणवीस यांनी अधिकाऱ्यांना रोखले. बोलू द्या असा हातानेच इशारा करून सांगितले.