Ashok Kharat Case: अशोक खरातचे कारनामे संपता संपेना, ऑफिस-बंगल्यावरील छाप्यानंतर पोलिसही चक्रावले

भोंदू अशोक खरातला अटक केल्यानंतर चौकशीत अनेक गोंष्टी समोर येऊ लागल्या. अशोक खरातने महिलांचे केलेले लैगिंक शोषण केल्याचे समोर आलेच, त्याशिवाय, इतरही घोटाळे समोर आले. पोलिसांनी दिलेल्या माहितीनुसार, खरातच्या घरातून असंख्य आधार कार्ड आणि पॅन कार्ड जप्त करण्यात आले असून, भक्तांच्या नावावर बनावट बँक खाती उघडून कोट्यवधींचा झोल केल्याचा संशय बळावला आहे.

प्राथमिक तपासात खरातने विविध बँकांमध्ये तब्बल १३१ बनावट खाती उघडल्याचे समोर आले आहे. ही खाती प्रामुख्याने नाशिक, अहिल्यानगर (अहमदनगर) आणि पुणे येथील पतसंस्थांमध्ये आहेत.

खरातकडे येणाऱ्या भक्तांकडून 'पूजाविधी' किंवा 'देवदर्शनाच्या' नावाखाली आधार आणि पॅन कार्डच्या झेरॉक्स घेतल्या जात होत्या. या कागदपत्रांचा वापर करून भक्तांना अंधारात ठेवून त्यांच्या नावे खाती उघडली गेली. सर्वात धक्कादायक बाब म्हणजे, या सर्व बनावट खात्यांवर खरातने स्वतःचे नाव 'वारसदार' (Nominee) म्हणून लावले होते. तसेच, व्यवहारांचे मेसेज खातेदारांना जाऊ नयेत म्हणून स्वतःचाच मोबाईल नंबर या खात्यांना लिंक केला होता.

आपल्यावरील विश्वास वाढवण्यासाठी अशोक खरात भाविकांना त्यांची वैयक्तिक माहिती देत असे. मात्र, ही माहिती एका नेटवर्कमधून खरातकडे येत असे. भक्तांची वैयक्तिक आणि आर्थिक माहिती गोळा करण्यासाठी खरातने पंटरांचे एक मोठे जाळे विणले होते. श्रीमंत भक्तांना 'टार्गेट' करून त्यांची फसवणूक केली जात असल्याचा अंदाज पोलिसांनी वर्तवला आहे.

लैंगिक शोषण प्रकरणातील एका पीडितेने दिलेल्या जबाबातून या आर्थिक गैरव्यवहाराची माहिती पोलिसांना मिळाली होती. सरकारवाडा पोलीस ठाण्यात गुन्हा दाखल झाल्यानंतर या प्रकरणाला आता मोठे वळण मिळाले आहे. खरातच्या या आर्थिक जाळ्यात काही बँक अधिकारी किंवा पतसंस्थांचे व्यवस्थापक सामील आहेत का, याचा तपास आता SIT (विशेष तपास पथक) करत आहे.