बच्चू कडू यांनी शेतकऱ्यांच्या कर्जमाफीसाठी आंदोलन छेडलं, इकडे जिल्हा बँकेचं अध्यक्षपद गेलं, टायमिंगची चर्चा

अमरावती : शेतकऱ्यांच्या कर्जमाफीसाठी शक्तिशाली महायुती सरकारविरोधात उपोषणास्त्र उगारलेल्या शेतकरी नेते बच्चू कडू यांना मोठा दणका बसला आहे. त्यांच्याकडे असलेल्या अमरावती जिल्हा बँकेच्या अध्यक्षपदावरू त्यांना अपात्र ठरविण्यात आले आहे. त्यांना एका प्रकरणात एका वर्षाची शिक्षा झाल्याने त्यांची निवड रद्द करण्यात येत असल्याचे विभागीय सहनिबंधक यांनी सांगितले. शेतकऱ्यांसाठी उपोषण करून कर्जमाफीचा मु्द्दा ऐरणीवर आणल्याने सध्या बच्चू कडू यांची राज्यात चर्चा सुरू होती. त्याचवेळी त्यांचे अध्यक्षपद गेल्याने, दोन्ही घटनांच्या टायमिंगची राजकीय वर्तुळात चर्चा होत आहे. मात्र भाजपच्या दबावाला आम्ही घाबरणार नसून आमच्या शरीरात रक्ताचा थेंब असेपर्यंत आम्ही लढत राहू, असे बच्चू कडू म्हणाले.