बीडमध्ये भीषण अपघात, देवदर्शनासाठी जाणाऱ्या 6 जणांना भरधाव कंटेनरने उडवलं, चौघांचा जागीच मृत्यू

मिळालेल्या माहितीनुसार, भरधाव वेगाने येणाऱ्या एका कंटेनरने रस्त्यावरून पायी चालणाऱ्या सहा लोकांना जोरदार धडक दिली. या धडकेत चौघे जागीच ठार झाले तर दोघे गंभीर जखमी झाले आहेत. जखमींना तातडीने बीडच्या जिल्हा रुग्णालयात दाखल करण्यात आले आहे. डॉक्टरांकडून त्यांच्यावर उपचार सुरू आहेत. मात्र दोघांची प्रकृती चिंताजनक असल्याचं सांगण्यात येत आहे.

प्राथमिक माहितीनुसार, अपघातातील सर्व लोक पेंडगाव येथे देव दर्शनासाठी जात होते. मात्र वाटेतच त्यासोबत ही दुर्घटना घडली आहे. या मृत आणि जखमींची नावे अद्याप समजू शकलेली नाहीत. पोलीस अपघातग्रस्तांची ओळख पटवत आहेत. या अपघातामुळे सोलापूर धुळे महामार्गावर काही वेळ वाहतूक सेवा विस्कळीत झाली होती.

गेल्या काही दिवसांमध्ये गढी उड्डाणपुलाजवळ अशाच प्रकारच्या अपघातात पाच ते सहा लोकांचा मृत्यू झाला होता. या महामार्गावर वारंवार होणाऱ्या अपघातांमुळे स्थानिकांमध्ये संतापाचं वातावरण आहे. दरम्यान, बीड ग्रामीण पोलिसांनी घटनास्थळी धाव घेऊन कंटेनर चालकाला ताब्यात घेतले आहे. पोलीस या प्रकरणाचा पुढील तपास करत आहेत.