पंकजा मुंडे vs सुरेश धस यांच्यातील संघर्ष पेटला, भाजपला फटका, पदाधिकाऱ्यांच्या निवडी रखडल्या

पदाधिकाऱ्यांच्या निवडीमध्ये मुंडे आणि धस यांच्यात कोण बाजी मारतो? यावरूनच पक्ष नेमका कोणाच्या पाठीशी आहे हे देखील स्पष्ट होऊ शकणार आहे. मात्र तूर्त पंकजा मुंडे आणि सुरेश धस यांच्यातील कलगीतुरा बीडसह राज्यातील राजकीय वर्तुळातही विशेष चर्चेत आहे.

बीड जिल्ह्यात भाजपाचे 24 मंडळ अध्यक्ष जाहीर होणार आहेत. त्यापैकी 20 मंडळ अध्यक्षांची निवड जाहीर झाली आहे. आष्टी मतदारसंघात तांत्रिक अडचणींमुळे ही निवड अद्याप झाली नाही. लोकनेत्या पंकजा मुंडे आणि भाजपाच्या वरिष्ठ नेत्यांच्या मार्गदर्शनाखाली या निवडी लवकरच जाहीर होतील, असे भाजपचे जिल्हाध्यक्ष शंकर देशमुख यांनी सांगितले आहे.

पंकजा मुंडे यांनी विधानसभा निवडणुकीत भाजपचा मी अधिकृत उमेदवार असतानाही माझ्याविरोधात अपक्ष उमेदवार उभा केला. संबंधित उमेदवारासाठी काम करण्याच्या सूचना भाजपच्या पदाधिकाऱ्यांना दिल्या. त्यांचे हे वर्तन पक्षविरोधी असल्याचे जाहीरपणे निवडणूक निकालानंतर सुरेश धस यांनी सांगितले. त्यानंतर असे कुठलेही कृत्य मी केले नसल्याचा पलटवार पंकजा मुंडे यांनी केला. तसेच देशमुख हत्या प्रकरणातही सुरेश धस यांनी मुंडे बहीण भावाला जोरदार लक्ष्य केले. विधानसभा निवडणूक निकालानंतर धस-मुंडे यांच्यातील दुरावा मोठ्या प्रमाणावर वाढला आहे.