Weather Alert: महाराष्ट्रात अचानक बदलली हवा, मुंबईसह 11 जिल्ह्यांबद्दल नवी अपडेट

गणपती विसर्जनानंतर राज्यामधून पावसाने काढता पाय घेतला आहे. त्याचबरोबर वातावरणातील दमटपणा वाढला असून तापमानामध्ये देखील वाढ पाहायला मिळत आहे. 10 सप्टेंबर रोजी राज्यामध्ये कोणत्याही जिल्ह्याला हवामान विभागाने सतर्कतेचा कोणताही अलर्ट दिलेला नाही. परंतु, परभणी, हिंगोली, नांदेड आणि लातूर या मराठवाड्यातील जिल्ह्यांमध्ये हलक्या ते मध्यम पावसाची शक्यता आहे. 10 सप्टेंबर रोजीचा राज्यातील हवामान अंदाज जाणून घेऊ.

मुंबई शहर आणि उपनगरामध्ये बुधवारी कमाल तापमानात वाढ होण्याची शक्यता आहे. मुंबईत कमाल तापमान 32°c किमान तापमान 24°c तर सामान्यतः ढगाळ आकाश राहून मध्यम स्वरूपाच्या पावसाची शक्यता आहे. कोकणातील इतर जिल्ह्यांमध्ये ही अशाच प्रकारचं वातावरण राहण्याची शक्यता आहे.

पश्चिम महाराष्ट्रातील पुणे शहर आणि परिसरात ढगाळ आकाशासह हलक्या पावसाची शक्यता आहे. पुण्यातील कमाल तापमान 30°c तर किमान तापमान 19°c एवढं असेल. सोलापूर, कोल्हापूर, सांगली आणि सातारा या जिल्ह्यांमध्ये तुरळक ठिकाणी हलक्या पावसाची शक्यता असून कुठेही जोरदार किंवा मुसळधार पावसाचा अंदाज नाही.

उत्तर महाराष्ट्रात मागील काही दिवसात जोरदार पाऊस झाला. परंतु, आता पावसाने माघार घेतली आहे. नाशिक मध्ये 10 सप्टेंबर रोजी साधारणपणे ढगाळ आकाश राहणार असून मध्यम स्वरूपाचा पाऊस होऊ शकतो. कमाल तापमान 27 अंश सेल्सिअस तर किमान तापमान 18 अंश सेल्सिअस एढा असेल. अहिल्यानगर, धुळे, नंदुरबार, जळगाव या जिल्ह्यांमध्येही ढगाळ आकाश राहण्याची शक्यता आहे.

मराठवाड्यात आठही जिल्ह्यांना पावसाचा कोणताही इशारा हवामान विभागाने दिलेला नाही. लातूर, नांदेड, परभणी, हिंगोली या जिल्ह्यांमध्ये काही ठिकाणी विजांसह हलका ते मध्यम पाऊस होऊ शकतो. छत्रपती संभाजीनगर मध्ये सामान्यतः ढगाळ आकाश राहून मध्यम पावसाची शक्यता आहे. कमाल तापमान 31 तर किमान तापमान 22 अंश सेल्सिअस एवढं असेल.

विदर्भामध्ये कमाल तापमानात कमालीची वाढ झाल्याचे जाणवत आहे. नागपूर मध्ये कमाल तापमान 33 अंश सेल्सिअस तर किमान तापमान 24 अंशांपर्यंत पोहोचण्याची शक्यता आहे. तर ढगाळ आकाश राहून हलक्या ते मध्यम पावसाची शक्यता हवामान विभागाने वर्तवली आहे.

एकंदरीत पुढील दोन दिवस राज्यामध्ये मुसळधार पावसाचा कोणताही अलर्ट भारतीय हवामानशास्त्र विभागाने दिलेला नाही. परंतु 11 सप्टेंबरपासून विदर्भातून राज्यात पावसाला पुन्हा सुरुवात होणार आहे. तर हळूहळू दक्षिण महाराष्ट्र, कोकण, दक्षिण मराठवाडा या भागांमध्ये पावसाचा जोर वाढणार आहे.