Nepal : एकमेव त्रिकोणी ध्वज, असं काय आहे त्यात खास? ज्यामुळे नेपाळला जगात मिळाली वेगळीच ओळख

तुम्ही एक गोष्ट नक्कीच पाहिली असेल ती म्हणजे जगातील जवळजवळ सगळ्याच देशांचे राष्ट्रीय ध्वज चौकोनी किंवा आयताकृती असतात. परंतु एक असा देश आहे ज्याचा राष्ट्रीय ध्वज या सगळ्याला अपवाद आहे. या देशाचा राष्ट्रीय ध्वज हा आयताकृती किंवा चौकोनी नसून तो थेट त्रिकोणी आहे.

हा देश आहे भारताचा शेजारील देश नेपाळ. जो सध्या तेथील जेनझींच्या आंदोलनामुळे चर्चेत आला आहे. पण अनोख्या डिझाइनमुळे नेपाळचा ध्वज जागतिक स्तरावर विशेष लक्ष वेधून घेतो.

या झेंड्यामध्ये असं काय खास आहे? आणि त्याचं महत्व काय चला जाणून घेऊ

नेपाळच्या ध्वजात दोन एकमेकांवर ठेवलेले त्रिकोण दिसतात. हे त्रिकोण हिमालय पर्वतरांगांचे प्रतीक मानले जातात. तसेच ध्वजामध्ये असलेले सूर्य आणि चंद्राचे चिन्ह नेपाळी संस्कृतीत अमरत्व, स्थैर्य आणि शांती यांचे प्रतीक आहे. सूर्य-चंद्राच्या उपस्थितीमुळे नेपाळचे अस्तित्व सदैव टिकून राहील, अशी श्रद्धा व्यक्त केली जाते.

या ध्वजाचा लाल रंग शौर्य, धैर्य आणि देशभक्तीचे प्रतीक आहे. लाल हा नेपाळचा राष्ट्रीय रंगही आहे. तर ध्वजाभोवती असलेली निळी किनार शांती आणि सामंजस्याचे द्योतक आहे. त्यामुळे हा ध्वज केवळ भौमितिक दृष्ट्या वेगळा नसून सांस्कृतिक अर्थानेही समृद्ध आहे.

1962 मध्ये नेपाळने आपला ध्वज अधिकृतरित्या मान्य केला. आज संयुक्त राष्ट्रसंघापासून ते विविध आंतरराष्ट्रीय मंचांवर नेपाळचा त्रिकोणी ध्वज सहज लक्ष वेधून घेतो. प्रत्येक देशाचा ध्वज वेगळेपण सांगतो, पण नेपाळच्या ध्वजामुळे "भौमितिक विविधतेतही राष्ट्रीय अभिमान कसा सामावू शकतो" याचे उत्तम उदाहरण जगासमोर येते.

प्रतिकात्मक फोटो

नेपाळचा त्रिकोणी ध्वज हा केवळ राष्ट्रीय प्रतीक नाही, तर तो परंपरा, श्रद्धा आणि सांस्कृतिक ओळखीचे अनोखे मिश्रण आहे. हिमालयासारखे भव्य आणि सूर्य-चंद्रासारखे शाश्वत अस्तित्व असलेले नेपाळ या ध्वजातून जगाला आपली वेगळी ओळख दाखवतो.