तुमच्याकडे Farmer ID नाहीये का? मग हे काम करावेच लागणार,अन्यथा आर्थिक मदत मिळणार नाही

सप्टेंबर महिन्यात सोलापूर जिल्ह्यात सीना आणि भीमा नद्यांना आलेल्या पूरामुळे तसेच अतिवृष्टीमुळे मोठ्या प्रमाणावर शेतीचे नुकसान झाले. जिल्ह्यातील एकूण ८० महसूल मंडळांमध्ये ७ लाख ६४ हजार १७३ शेतकरी बाधित झाले आहेत. या नुकसानीची भरपाई म्हणून राज्य शासनाने ८६७ कोटी ३३ लाख ६३ हजार ८५५ रुपयांचा निधी मंजूर केला आहे. हा मदत निधी शेतकऱ्यांच्या खात्यांवर जमा करण्याची प्रक्रिया सुरू असून, अनेकांना रकमेचा लाभ मिळायला प्रारंभ झाला आहे.

तथापि, अनेक शेतकऱ्यांच्या खात्यांवर अद्याप पैसे जमा झालेले नाहीत. दिवाळीनंतर चार दिवस उलटूनही काही शेतकऱ्यांना मदत निधी मिळालेला नाही. प्रशासनाकडून मिळालेल्या माहितीनुसार, ज्या शेतकऱ्यांकडे फार्मर आयडी आहे आणि अॅग्रीस्टॉक योजनेची प्रक्रिया पूर्ण झाली आहे, त्यांना ई-केवायसी करण्याची गरज नाही. मात्र, ज्या शेतकऱ्यांकडे अॅग्रीस्टॉक क्रमांक नाही किंवा फार्मर आयडी तयार केलेला नाही, त्यांनी लवकरात लवकर ई-केवायसी प्रक्रिया पूर्ण करावी, अशी सूचना कृषी विभागाकडून देण्यात आली आहे.