बुलढाणा हादरलं! आठवीत शिकणाऱ्या दोन मित्रांनी 48 तासांत संपवलं आयुष्य

बुलडाणा शहरातील एका नामांकित विद्यालयात आठव्या वर्गात शिकणा-या दोन वर्ग मित्रांनी राहत्या घरात गळफास घेऊन आयुष्य संपवलं. दोन दिवसातील दुसऱ्या घटनेने जिल्ह्यातील पालकांमध्ये अस्वस्थता पसरली. अवघ्या चौदा वर्षे वयाच्या दोन विद्यार्थ्यांनी लागोपाठ दोन दिवसांच्या अंतराने असे टोकाचे पाऊल उचलल्याने शैक्षणिक क्षेत्रही चिंतीत झाले आहे.

शहरातील भारत विद्यालयात आठव्या वर्गात शिकणा-या नमन अरुण राऊत या विद्यार्थ्याने शिक्षक व शिक्षिका असलेले त्याचे आईवडील हे कर्तव्यावर बाहेरगावी गेले असतांना 11 फेब्रुवारी रोजी आपल्या राहत्या घरी गळफास घेऊन आत्महत्या केली होती. या दुःखद घटनेच्या पाठोपाठ काल सायंकाळी अथर्व वैभव राणे याने शाळेतून परतल्यानंतर सुंदरखेड परिसरातील राहत्या घरात गळफास घेऊन आत्महत्या केली.

वैभवचे वडील कारागृह पोलीस आहेत. बुलडाण्यातील अल्पवयीन वर्गमित्र विद्यार्थ्यांच्या आत्महत्यांच्या घटनांनी पालकवर्गाला प्रचंड धक्का बसला आहे. या अनाकलनीय घटनांमागील कारण शोधणे हे पोलिसांसमोर आव्हान आहे. पोलिसांकडून पालक, मित्र परिवार आणि शाळेतील शिक्षकांची चौकशी सुरू आहे. या घटनेनंतर संपूर्ण गाव हादरलं आहे.