Buldhana Crime : बुलढाण्यात शॉर्टकट श्रीमंत होण्याचा हव्यास नडला; 4 तरुणांना अटक, कसा होता ट्रॅप?

पोलिसांनी दिलेल्या माहितीनुसार हे चौघेजण दोन लाखाच्या मोबदल्यात चार लाख रुपये देण्याचे आमिष देऊन फसवणुकीच्या तयारीत होते. मात्र, वेळीच पोलिसांनी या चौघांना रंगेहाथ पकडून अटक केली आहे. हे चौघेही आरोपी खामगाव शहरातील रहिवासी असून यामध्ये सचिन भास्कर दुतोंडे (वय 34,राहणार बर्डे प्लॉट) मयूर किशोर सिद्धपुरा (वय 34), विलास बाबुराव ठाकरे (वय 38), लखन गोपाल बजाज (वय 33 वर्ष सर्व राहणार अभय नगर दंडे स्वामी मंदिराजवळ घाटपुरी नाका) यांचा समावेश आहे. या चौघांकडून एक टाटा हरिअर कार आणि भारतीय बच्चो का बँक असे लिहिलेल्या पाचशेच्या सहा हजार शंभर नोटा, खऱ्या 500 च्या 849 नोटा आणि सहा अँड्रॉइड फोन जप्त केले आहेत. गुन्हा करण्याच्या उद्देशाने या चौघांनी कारला बनावट नंबर प्लेट देखील लावली असल्याचं पोलिसांकडून सांगण्यात आलं आहे.