माझा लास्टचा दिवस...! डोळ्यासमोर मेहुण्याचा मृत्यू, तरुणाचं टोकाचं पाऊल, 'त्या' घटनेनं छ. संभाजीनगरात खळबळ

वडगाव कोल्हाटी येथील विनोद लक्ष्मण जाधव (25) आणि त्याचे मेहुणे सिद्धार्थ शिवाजी दिवेकर (35) हे दोघे 3 एप्रिल रोजी गट क्रमांक 68 मधील पाझर तलावात पोहण्यासाठी व मासेमारीसाठी गेले होते. पोहोत असताना सिद्धार्थ यांचा पाण्याचा अंदाज चुकला आणि ते खोल पाण्यात जाऊ लागले. ही परिस्थिती पाहताच विनोद यांनी त्यांना वाचवण्यासाठी जीवाचे रान केले, मात्र सर्व प्रयत्न अपुरे ठरले आणि त्यांच्या डोळ्यांसमोरच सिद्धार्थ यांचा दुर्दैवी अंत झाला.

“मला तुमचं खूप ध्यान येतंय, आज माझा लास्टचा दिवस आहे, आई-वडिलांना नीट सांभाळ …”, विनोदने हा मेसेज धाकट्या भावाला केला आणि धावत्या रेल्वेसमोर उडी घेतली. या दुर्दैवी घटनेत त्याचा जागीच मृत्यू झाला.

दरम्यान, दोघेही घरी परतले नसल्याने त्यांच्या नातेवाईकांनी शोधाशोध सुरू केली होती. शनिवारी सकाळी तलावाच्या काठावर त्यांची दुचाकी, कपडे आणि मोबाईल सापडल्याने संशय अधिक गडद झाला. माहिती मिळताच पदमपुरा व एमआयडीसी अग्निशमन दलाने तातडीने शोधमोहीम हाती घेतली. दुपारपर्यंत सिद्धार्थ दिवेकर यांचा मृतदेह तलावातून बाहेर काढण्यात आला.