गरीबाच्या पोरानं नाव कमावलं! प्रतिष्ठित विद्यापीठात मिळवली 14 लाखांची फेलोशिप, अत्यंत प्रेरणादायी कहाणी

धाराशिव : परिस्थिती कितीही कठोर आली तरी संघर्ष करत सकारात्मक राहत प्रत्येक संकटाला तोंड देत काही जण सर्वांसमोर प्रेरणादायी उदाहरण सादर करतात. आज अशाच एका तरुणाची कहाणी आपण जाणून घेणार आहोत, ज्याची आर्थिक परिस्थिती अत्यंत हालाखीची असताना त्याने मेहनत करत जिद्दीने अभ्यास केला आणि तब्बल 14 लाख रुपयांची फेलोशिप मिळवली आहे.

समाधान हा महाराष्ट्रातील दुष्काळी मराठवाड्यातील धाराशिव जिल्ह्यातील भूम तालुक्यातील सुकटा येथील रहिवासी आहे. त्याचे वडील रोजंदारीचे कामाला जायचे. तो अल्पभूधारक कुटुंबातून येत असल्याने शेतीवर अवलंबून न राहता त्याच्या आईला रोजंदारीने कामाला जावे लागते. समाधान दहावीत असताना त्याच्या वडिलांचे निधन झाले. त्या दरम्यान, त्याची बोर्डाची परीक्षा केवळ दोन महिन्यांवर राहिली होती. मात्र, या कठीण काळात डगमगून न जाता अभ्यास केला आणि समाधानला 81 टक्के गुण मिळाले.

अशोका विद्यापीठाच्या एका वर्षाच्या फेलोशिप प्रोग्रामसाठी समाधानने अर्ज केला होता. या प्रक्रियेमध्ये त्याने केलेल्या कष्ट, जिद्द आणि संघर्षाचे फळ मिळाले. समाधानची अशोका विद्यापीठाच्या फेलोशिपसाठी निवड झाली आहे. आजही 250 रुपये रोजाने कामाला जाणाऱ्या समाधानच्या आईच्या चेहऱ्यावर हास्य पाहायला मिळालं. आजही समाधानच्या आई या रोजंदारीने कामाला जातात. तर समाधान आता दिल्लीत शिक्षण घेत आहे. उद्याच्या उज्ज्वल भविष्यासाठी तो अत्यंत मेहनत घेत आहे. त्याचा हा प्रवास ग्रामीण भागातील तरुणासाठी अत्यंत प्रेरणादायी आहे.