नवरात्री विशेष : नवसाची मुलं झोळीत झेलली जातात, जालन्यातील ही परंपरा नेमकी काय?

जालना - संपूर्ण देशभरात विजयादशमी म्हणजे दसऱ्याचा उत्साह पाहायला मिळत आहे. नवरात्राचे 9 दिवस राज्यभरातील देवीची मंदिरे गर्दीने गजबजली होती. अनेक ठिकाणच्या प्रथा परंपरा लक्षवेधी ठरल्या. यामध्ये शेकडो वर्षांपासून चालत आलेल्या या प्रथा परंपरा आजही तेवढ्याच उत्साहाने पाळल्या जातात. जालना जिल्ह्यातील मत्स्योदरी देवी संस्थान हे जागृत देवस्थान म्हणून प्रसिद्ध आहे. या ठिकाणची नवसाच्या बाळांना झोळीत झेलण्याचा परंपरा देखील अशीच आगळीवेगळी आणि लक्षवेधी परंपरा आहे. याचबाबत लोकल18 च्या टीमने घेतलेला हा विशेष आढावा.

मच्छोदरी देवी संस्थान ही जालना जिल्ह्यातील अंबड शहरांमध्ये स्थित आहे. नवरात्र उत्सवाचे 9 दिवस इथे मोठा उत्सव असतो. दरवर्षी नवरात्र उत्सवाची सुरुवात घटस्थापनेने होते. मत्स्योदरी देवी संस्थानाचे अध्यक्ष हे परंपरेने तहसीलदार पदावरील व्यक्ती असते. त्यांच्या हस्ते संपत्ती घटस्थापनेचा कार्यक्रम पहिल्या दिवशी होतो. यानंतर सातव्या माळेचा मान हा जिल्ह्याचे जिल्हाधिकारी यांना असतो. यावर्षी देखील जिल्हाधिकारी डॉ. श्रीकृष्ण पांचाळ यांनी या ठिकाणी पूजा केली. सातव्या माळेला जिल्हाभरामध्ये प्रशासकीय सुट्टी देखील असते. 9 दिवस मोठी यात्रा या ठिकाणी भरते. संपूर्ण नवरात्र उत्सव भाविक भक्तांची रेलचेल या ठिकाणी पाहायला मिळते.