गृहमंत्र्यांचा तोतया ओएसडी अन् कल्पनाच्या प्रियकराला बेड्या, रात्री दिल्लीतून दोघांना घेतलं ताब्यात

कल्पना भागवत ही अभिषेक चौधरीच्या सतत संपर्कात होती. त्यामुळे, अशा अनेक तोतया आयएएस अधिकाऱ्यांचे एक मोठे सिंडिकेटच कार्यरत असल्याचे सबळ पुरावे तपास यंत्रणांच्या हाती लागले आहेत. सोमवारपासून तपास यंत्रणांची चार विशेष पथके दिल्ली, नोएडा, हरयाणा आणि राजस्थानच्या सीमेवर या आरोपींचा कसून शोध घेत होती. अखेर रात्री उशिरा या तोतया 'ओएसडी'ला पकडण्यात तपास यंत्रणांना मोठे यश आले.

तपास यंत्रणा आता या तोतया 'ओएसडी' आणि कल्पनाच्या प्रियकराच्या आपसातील संपर्काची आणि या दोघांचेही विदेशी लोकांसोबत काही संबंध आहेत का, या दिशेने तपास करत आहेत. यासाठी एका स्वतंत्र पथकाची नेमणूक करण्यात आली आहे.

तपासाच्या सुरुवातीच्या टप्प्यात कल्पना भागवतच्या बँक खात्यात विविध व्यक्तींकडून १९ लाख रुपये जमा झाल्याचे उघड झाले होते, ज्यामुळे हे एक मोठे रॅकेट असल्याचे स्पष्ट झाले होते. केंद्रीय गुप्तचर यंत्रणांच्या सूत्रांनी या १९ लाखांच्या व्यवहारांचा तपशील दिला आहे. यात दत्तात्रयने ७ लाख ९० हजार, अभिजितने १ लाख ५० हजार, अशरफ (प्रियकर) २ लाख ३१ हजार, जैनने १ लाख ५० हजार, सुधाकरने १ लाख २१ हजार, आष्टेकरने १ लाख ५० हजार आणि बहादुरे यांनी ९८ हजार रुपये महिलेला पाठवल्याचं समोर आलं आहे.

आता कल्पनाला पैसे देणारी ही माणसं कोण आहेत आणि त्यांनी कल्पनाला कशासाठी हे पैसे दिले, हे अद्याप स्पष्ट झालेले नाही. या संपूर्ण सिंडिकेटचा पर्दाफाश करण्यासाठी तपास यंत्रणांनी सखोल तपासाला सुरुवात केली असून यातून आणखी मोठी नावे उघड होण्याची शक्यता आहे.