कारवाई केल्याशिवाय सुटका नाही! पाहणी करायला आलेल्या अधिकाऱ्याला गावकऱ्यांनी ठेवलं चक्क कोंडून

कोल्हापूर : गेल्या काही दिवसांपासून कृष्णा नदीचे पाणी प्रदूषित होत आहे. नदीला काळेकुट्ट मळीमिश्रित पाणी आल्याने जलचर प्राणी मृत पावले आहेत. तसेच मोठ्या प्रमाणात जलपर्णीचा विळखा पडल्याने पाण्यातील ऑक्सिजनचे प्रमाण कमी होऊन पाण्याला दुर्गंधी सुटली आहे. त्यामुळे कृष्णाकाठावरील गावांत आरोग्याचा प्रश्न गंभीर बनला आहे. अर्जुनवाड (ता. शिरोळ) येथे आज ग्रामस्थांच्या संयमाचा अखेर बांध फुटला. कृष्णा नदीत वाढत चाललेल्या प्रदूषणाच्या पार्श्वभूमीवर प्रदूषण नियंत्रण मंडळ कोल्हापूरचे अधिकारी रोहिदास मातकर पाहणीसाठी आले असता संतप्त नागरिकांनी त्यांना घेराव घालत प्रदूषण करणाऱ्या उद्योगांवर तात्काळ कठोर कारवाई करण्याची जोरदार मागणी केली. कारवाई झाल्याशिवाय मागे हटणार नाही, असा सज्जड इशारा देत अधिकाऱ्यांना धारेवर धरल्याने परिसरात तणावपूर्ण वातावरण निर्माण झाले.