अमेरिकी शेअर बाजारात हाहाकार, ट्रम्प यांच्या एका निर्णयाने डाऊ जोन्समध्ये मोठी घसरण; लाखो कोटी पाण्यात

अमेरिकन सर्वोच्च न्यायालयाने 6-3 अशा बहुमताने दिलेल्या निकालात मागील वर्षी लावण्यात आलेल्या अनेक टॅरिफना बेकायदेशीर ठरवले. प्रशासनाने ज्या आपत्कालीन कायद्याचा आधार घेत टॅरिफ लागू केले होते, तो अशा प्रकारच्या निर्णयासाठी योग्य नसल्याचे न्यायालयाने स्पष्ट केले. मात्र या टॅरिफमुळे उद्योगांना परतावा (refund) द्यायचा की नाही, याबाबत न्यायालयाने कोणताही निर्णय दिला नाही. या मुद्द्यामुळे अमेरिकन उद्योगांवर सुमारे 170 अब्ज डॉलरपर्यंतचा आर्थिक परिणाम होऊ शकतो.

नव्या टॅरिफ घोषणेनंतर बाजारात तात्काळ नकारात्मक प्रतिक्रिया उमटली. डाऊ जोन्स फ्युचर्स सुमारे 668 अंकांनी घसरले. S&P 500 फ्युचर्समध्ये सुमारे 0.75% आणि Nasdaq-100 फ्युचर्समध्ये 0.89% पर्यंत घसरण नोंदवली गेली.

टॅरिफसंदर्भातील अनिश्चिततेमुळे तेलाच्या किमतींमध्येही घसरण दिसली. ब्रेंट क्रूड सुमारे 0.5% घसरून 70.27 डॉलर प्रति बॅरलवर आला, तर अमेरिकन कच्चे तेल 66.28 डॉलरच्या आसपास पोहोचले. क्रिप्टोकरन्सी बाजारातही दबाव जाणवला. बिटकॉइन एकवेळ 65,000 डॉलरच्या खाली घसरला, मात्र नंतर 66,141 डॉलरपर्यंत सावरला. मागील 24 तासांत बिटकॉइनमध्ये सुमारे 3% घट नोंदवली गेली.

प्रीमर्केट ट्रेडिंगमध्ये बहुतेक मोठ्या टेक कंपन्यांचे शेअर्स दबावाखाली होते. Alphabet Inc. मध्ये सुमारे 0.5% वाढ झाली, तर Nvidia Corporation च्या शेअरमध्ये 0.15% घट झाली. गुंतवणूकदारांचे लक्ष बुधवारी जाहीर होणाऱ्या Nvidia च्या निकालांकडे लागले आहे. विशेषतः आर्टिफिशियल इंटेलिजन्स (AI) खर्चावरील संकेतांबाबत.

औषधनिर्मिती कंपनी Eli Lilly and Company च्या शेअर्समध्ये 2.5% वाढ झाली. तिच्या लठ्ठपणा उपचारासाठीच्या औषधाने कोपेनहेगनमध्ये झालेल्या चाचणीत प्रतिस्पर्धी Novo Nordisk च्या औषधापेक्षा चांगले परिणाम दिल्याची माहिती समोर आली आहे.

गुंतवणूकदार आता ड्युरेबल गुड्स आणि फॅक्टरी ऑर्डर्ससारख्या आर्थिक आकडेवारीकडे लक्ष ठेवून आहेत. तसेच इराणशी संबंधित भू-राजकीय तणाव आणि Nvidia च्या आगामी निकालांवर बाजाराची पुढील दिशा अवलंबून राहणार आहे.