Latur ZP Election Result : लातूरचा गड कोण राखणार? भाजप-काँग्रेसमध्ये थेट फाईट, मतमोजणीला सुरूवात

काटगाव - काँग्रेस लातूर ग्रामीण मधील माजी आमदार वैजनाथ शिंदे यांच्या सुनबाई अश्विनी दत्तात्रय शिंदे विरुद्ध लातूर जिल्हा मध्यवर्ती बँकेचे उपाध्यक्ष राहिलेले नाथसिंह देशमुख यांची पत्नी पूर्वादेवी नाथसिंह देशमुख यांच्यात मुख्य लढत आहे.

भाजपचे लातूर ग्रामीणचे आमदार रमेश आप्पा कराड यांचे चिरंजीव ऋषिकेश रमेश कराड यांनी रेनापुर तालुक्यातील पानगाव जिल्हा परिषद गटातून भाजपकडून उमेदवारी अर्ज दाखल केला होता. मात्र लोकप्रतिनिधींच्या मुलांनी, नातेवाईकांनी निवडणूक लढवू नये असे आदेश असल्यामुळे ऋषिकेश कराड यांनी आपली उमेदवारी मागे घेतली आहे. त्यांच्या ठिकाणी आता भाजपचे सतीश रावसाहेब आंबेकर विरुद्ध मनसेचे प्रदेश तथा जिल्हाध्यक्ष संतोष नागरगोजे यांचे बंधू सुनील गणपतराव नागरगोजे विरुद्ध काँग्रेसचे गणेश लिंबाजी तुरूप यांच्यात लढत होत आहे.

लोदगा जिल्हा परिषद गटातून काँग्रेसच्या माजी महिला जिल्हाध्यक्ष स्वयंप्रभा पाटील विरुद्ध औसा भाजपचे आमदार अभिमन्यू पवार यांचे अत्यंत विश्वासू संतोषअप्पा मुक्ता यांच्या पत्नी पूनम मुक्ता विरुद्ध शिवसेना उद्धव बाळासाहेब ठाकरे पक्षाचे जिल्हाध्यक्ष संतोष सोमवंशी यांच्या पत्नी अरुणा संतोष सोमवंशी यांच्या लढत होत आहे.

राज्याचे सहकार मंत्री तथा अहमदपूरचे राष्ट्रवादी काँग्रेस अजित पवार गटाचे आमदार बाबासाहेब पाटील यांचे चिरंजीव सुरज बाबासाहेब पाटील हे पंचायत समिती निवडणुकीत शिरूर ताजबंद गणातून राष्ट्रवादी काँग्रेस अजित पवार गटाकडून आपले नशीब आजमावत आहेत. त्यांच्याविरुद्ध काँग्रेसचे मंगेश चंद्रशेखर पाटील.. आणि शिवसेनेचे सिद्धेश्वर सुभाष औरादे यांच्यात लढत होत आहे.

भाजपचे माजी खासदार सुधाकर शृंगारे यांच्या कन्या सुप्रिया सुधाकर श्रृंगारे या चाकुर तालुक्यातील रोहिणा जिल्हा परिषद गटातून निवडणुकीसाठी उभ्या आहेत. त्यांच्याविरुद्ध काँग्रेसच्या सोनिया श्रीकृष्ण नाईकवाडे आणि राष्ट्रवादी काँग्रेस अजित पवार पक्षाच्या उषा सोनकांबळे यांच्यात लढत होत आहे.,

वाढवणा जिल्हा परिषद गटातून २०१७ च्या जिल्हा परिषदेचे माजी उपाध्यक्ष रामचंद्र तिरुके विरुद्ध काँग्रेसचे नागोराव चिमनदरे तसेच शिवसेना शिंदे गटाचे शंकर शेळके यांच्यात लढत होत आहे.