नगरमध्ये मध्यरात्री गोळीबाराचा थरार, पाठलाग करत तरुणाला घातल्या गोळ्या, धडकी भरवणारा CCTV VIDEO

मिळालेल्या माहितीनुसार, मंगळवारी रात्री साडेअकराच्या सुमारास अबरार शेख हा राज चेंबर्स परिसरात असताना ही घटना घडली. मुकुंदनगर परिसरातील एका तरुणाने त्याच्यावर अचानक गोळीबार केला. गोळ्या झाडल्यानंतर हल्लेखोर अंधाराचा फायदा घेत घटनास्थळावरून फरार झाला. रक्ताच्या थारोळ्यात पडलेल्या अबरारला तातडीने जिल्हा शासकीय रुग्णालयात दाखल करण्यात आले आहे. त्याची प्रकृती गंभीर असल्याचे समजते.

ही संपूर्ण घटना सीसीटीव्ही कॅमेऱ्यात कैद झाली आहे. या व्हिडीओत अबरार आपल्या एका मित्रासोबत दुचाकीने जाताना दिसत आहे. याच वेळी हल्लेखोराने त्याला टार्गेट करण्याचा प्रयत्न केला. यावेळी अबरारने जीव मुठीत घेऊन पळ काढला. पण हल्लेखोराने पाठलाग करत त्याला गोळ्या घातल्या. या घटनेचा व्हिडीओ आता सोशल मीडियावर व्हायरल झाला आहे.

घटनेची माहिती मिळताच तोफखाना पोलीस ठाण्याचे वरिष्ठ अधिकारी आणि कर्मचाऱ्यांनी घटनास्थळी धाव घेतली. पोलिसांनी परिसराची नाकाबंदी केली असून आरोपीचा माग काढण्यासाठी विशेष पथके रवाना करण्यात आली आहेत. सीसीटीव्ही फुटेजच्या मदतीने आरोपीचा शोध घेतला जात आहे. प्राथमिक अंदाजानुसार, हा हल्ला वैयक्तिक वादातून झाला असावा, अशी शक्यता पोलिसांनी वर्तवली आहे. पोलीस घटनेचा सविस्तर तपास करत आहेत.