जूनमध्ये नवरा मारला गेला, १ कोटींचं बक्षीस असलेल्या स्मृतीचे आत्मसमर्पण, माओवाद्यांना हादरा

पदवीपर्यंतचे शिक्षण झाल्यानंतर १९८५ मध्ये आंध्र प्रदेशात माओवाद्यांच्या संघटनेत दाखल झालेल्या स्मृतीने अनेक घटनांमध्ये सक्रीय सहभाग घेतला असून माओवाद्यांच्या राजकीय विचारधारेचे शिक्षण देणाऱ्या शाळेमध्ये ती सक्रीय होती.

माओवाद्यांच्या संघटनेत विविध पदांवर काम केलेल्या स्मृतीचे वडील तेलगू चित्रपटसृष्टीत अभिनेता होते. क्रांतीचे स्वप्न पाहणाऱ्या स्मृतीची लहान बहीण माधवी ही माओवादी असून ती जंगलात सक्रीय आहे. गेल्या जून महिन्यात स्मृतीच्या पतीला चकमकीत पोलिसांनी ठार मारल्यानंतर स्मृती हादरली. स्मृतीवर पाच राज्यात मिळून एक कोटी रुपयांचे बक्षीस असून तिच्यासोबत माओवाद्यांच्या संघटनेत सक्रीय असलेल्या हरीश या माओवाद्याने आज आत्मसमर्पण केले आहे.