नेपाळच्या Gen-Z चा हिरो बालेन शाहने केला होता भारतीय चित्रपटाला विरोध, काय आहे 2 वर्षांपूर्वीचं प्रकरण?

नेपाळमध्ये सध्या मोठी राजकीय अस्थिरता निर्माण झाली आहे. संतप्त झालेल्या तरुणाईने नेपाळची संसद आणि न्यायालयाच्या परिसरात आग लावली आहे. या अनागोंदीमुळे अनेक मंत्र्यांनी देश सोडून पळायला सुरुवात केली आहे.

परिस्थिती हाताबाहेर जात असल्याचं पाहून पंतप्रधान के. पी. ओली शर्मा यांनी त्यांच्या पदाचा राजीनामा दिला आहे. या पार्श्वभूमीवर, आता तरुणाईचे आदर्श असलेले लोकप्रिय नेते बालेन शाह हे नवीन सरकार बनवण्याची शक्यता वर्तवली जात आहे.

बालेन शाह हे केवळ एक राजकीय नेते नसून, ते तरुणाईचे आयडॉल आहेत. ‘टाईम मॅगझीन’ आणि ‘न्यूयॉर्क टाईम्स’नेही त्यांची दखल घेतली आहे. सोशल मीडियावर त्यांच्या पोस्ट्स अनेकदा राष्ट्रीय चर्चेचा विषय बनल्या आहेत. त्यांची जीवनशैली, विचारसरणी आणि व्यक्तिमत्त्व नव्या पिढीसाठी प्रेरणादायी आहे, त्यामुळेच जनरेशन-झेडच्या या आंदोलनात त्यांची महत्त्वाची भूमिका आहे.

२०२३ मध्ये ‘आदिपुरुष’ नावाचा चित्रपट आला होता. त्यावेळी काठमांडूचे महापौर असलेले बालेन शाह यांनी या चित्रपटातील काही संवादांवर जोरदार आक्षेप घेतला होता. त्यांनी हे संवाद चित्रपटातून काढून टाकण्याची मागणी केली होती आणि तसं न केल्यास नेपाळमध्ये कोणताही भारतीय चित्रपट चालू देणार नाही, असा थेट इशारा दिला होता. त्यांच्या या भूमिकेमुळे ते चर्चेत आले होते.

बालेन शाह यांनी दावा केला होता की या चित्रपटात सीता मातेला भारताची कन्या म्हणून दाखवण्यात आले आहे तर सीता यांचा जन्म नेपाळमधील जनकपूर येथे झाला होता. त्यांनी धमकी दिली की जर ही चूक नेपाळ आणि भारतात दुरुस्त केली नाही तर ते काठमांडूमध्ये कोणताही भारतीय चित्रपट प्रदर्शित होऊ देणार नाहीत.

बालेन शाह यांनी सुरुवातीला सिव्हिल इंजिनियर म्हणून करिअर केलं. त्यानंतर ते रॅपर म्हणून प्रसिद्ध झाले आणि अखेरीस त्यांनी राजकारणात प्रवेश केला. काठमांडूचे महापौर म्हणून निवड झाल्यावर त्यांनी वेगवेगळ्या विषयांवर परखड मत मांडून तरुणाईचा विश्वास जिंकला.

सोशल मीडियावर त्यांचे मोठ्या संख्येने फॉलोअर्स आहेत आणि त्यांच्या एका पोस्टमुळे कोणताही विषय वेगाने ट्रेंड होतो. आता ते नेपाळच्या पंतप्रधानपदी विराजमान होतात का, हे पाहणं महत्त्वाचं ठरेल.