Maratha Reservation : बीडमध्ये मराठा आंदोलनाचा भडका, क्षीरसागर काका-पुतण्याचं घर पेटवलं, Video

बीड, 30 ऑक्टोबर : मराठा आरक्षणासाठी एकीकडे मनोज जरांगे पाटील दुसऱ्यांदा उपोषणाला बसलेले असतानाच मराठा समाज आक्रमक झाला आहे. आरक्षणासाठी सुरू असलेल्या आंदोलनाला हिंसक वळण लागलं आहे. राष्ट्रवादी काँग्रेस शरद पवार गटाचे माजी आमदार आणि माजी मंत्री जयदत्त क्षीरसागर यांचं कार्यालय आंदोलकांनी पेटवलं आहे, तसंच जयदत्त क्षीरसागर यांच्या बीड शहरातील बंगल्यावर आंदोलकांनी दगडफेक केली आहे. आमदार संदीप क्षीरसागर यांचं घरावरही दगडफेक करण्यात आली आहे, तसं त्यांच्या घराबाहेरील साहित्यही पेटवून देण्यात आलं.

राष्ट्रवादीचे आमदार प्रकाश सोळंके यांच्या बीड येथील निवासस्थानाचीही तोडफोड करण्यात आली आणि आग लावली गेली. काही वेळातच आग घरभर पसरली आणि त्याच्या ज्वाळांनी जोर धरला. या जाळपोळीच्या घटनेनंतर राष्ट्रवादीचे आमदार प्रकाश सोळंके म्हणाले की, हल्ला झाला तेव्हा मी घरात होतो. सुदैवाने माझ्या कुटुंबातील कोणीही सदस्य किंवा कर्मचारी जखमी झाले नाहीत. आमदारांच्या घरांवर आणि कार्यालयांवर हल्ला केल्यानंतर बीडमध्ये शरद पवार गटाचे पक्ष कार्यालयही पेटवण्यात आले आहे.