BJP : रुग्ण नाही, तरीही सायरन जोरात! रुग्णवाहिकेचा बेकायदेशीर वापर, मुंबईत भाजप महिला नेता वादात, प्रकरण काय?

मिळालेल्या माहितीनुसार, अक्षता तेंडुलकर यांनी दादर परिसरात मागील काही वर्षात फेरीवाल्यांच्या विरोधात आंदोलन पुकारले आहे. दादरमधील फेरीवाल्यांमध्ये बांगलादेशी असल्याच्या संशयातून त्यांनी एकाला मारहाण केल्याचा प्रकारही समोर आला होता. त्यानंतर आता त्यांनी फेरीवाल्यांमुळे होणारी वाहतूक कोंडी दाखवण्यासाठी चक्क एका रुग्णवाहिकेचा वापर स्वतःच्या प्रवासासाठी केला. धक्कादायक म्हणजे, या रुग्णवाहिकेत कोणताही रुग्ण नव्हता किंवा कोणतीही वैद्यकीय आपात्कालीन स्थिती नव्हती. तरीही दादर मार्केटसारख्या अतिशय गर्दीच्या ठिकाणी मोठ्या आवाजात सायरन वाजवत ही रुग्णवाहिका फिरवण्यात आली.

रुग्णवाहिका ही केवळ रुग्णांच्या सेवेसाठी आणि आपत्कालीन परिस्थितीसाठी असते. रुग्णवाहिकेत रुग्ण नसताना सायरन वाजवणे हा कायदेशीर गुन्हा आहे. अक्षता तेंडुलकर आणि त्यांचे कार्यकर्ते या रुग्णवाहिकेत बसून फिरत असताना सायरनचा वापर केल्याने वाहतुकीचे नियम धाब्यावर बसवण्यात आल्याचा आरोप होत आहे.

या घटनेचा व्हिडिओ आणि माहिती समोर आल्यानंतर मुंबई वाहतूक पोलिसांनी याची गंभीर दखल घेतली आहे. रुग्णवाहिकेचा असा गैरवापर करणे बेकायदेशीर असल्याने अक्षता तेंडुलकर यांच्यावर कायदेशीर कारवाई करण्याची प्रक्रिया पोलिसांनी सुरू केली असल्याचे समजते.