धक्कादायक! हसला म्हणून तरुणाचे दोन्ही हात मनगटापासून छाटले; नांदेडमधील प्रकारानं खळबळ

नांदेड, 18 ऑगस्ट, मुजीब शेख : नांदेडमधून एक धक्कादायक घटना समोर आली आहे. किरकोळ कारणावरून फळ विक्रेत्यानं कोयत्यानं तरुणाचे मनगटापासून दोन्ही हात तोडले आहेत. शहरातील डी मार्ट परिसरात ही घटना घडली आहे. या घटनेनं शहरात खळबळ उडाली आहे. मोहम्मद अजहर असं या हल्ला झालेल्या तरुणाचं नाव आहे. तो डी मार्ट परिसरात भाजीपाला विक्रीचा व्यवसाय करतो. दरम्यान मोहम्मद अजहर या तरुणावर हल्ला करून हल्लेखोर फरार झाला आहे. त्याच्याविरोधात भाग्यनगर पोलीस ठाण्यात गुन्हा दाखल करण्यात आला आहे. फरार आरोपीचा शोध सुरू असल्याची माहिती पोलिसांकडून देण्यात आली आहे.