Nashik News: शेअर मार्केटमध्ये पैसे डबल? नाशिकच्या तिघांसोबत भयंकर घडलं, 17700000 रुपयांना गंडा!

सायबर गुन्हेगारांनी ऑगस्ट ते नोव्हेंबर या कालावधीत या तिघांशी संपर्क साधला. त्यांना एका बनावट व्हॉट्सअ‍ॅप ग्रुपमध्ये सामील करण्यात आले. या ग्रुपमध्ये आधीच असलेले गुन्हेगारांचे साथीदार 'गुंतवणूक किती फायदेशीर आहे' यावर खोटी चर्चा करून विश्वास संपादन करत असत. गुंतवणूकदारांना फसवण्यासाठी एका बनावट ॲपवर त्यांच्या रकमेत मोठी वाढ झाल्याचे (Virtual Profit) दाखवले जायचे. हा नफा पाहून भुरळ पडलेल्या तिघांनीही वेळोवेळी मोठी रक्कम गुंतवली.

जेव्हा या तिघांनी आपला नफा बँक खात्यात वळवण्याचा प्रयत्न केला, तेव्हा त्यांना तांत्रिक अडचणी सांगून आणखी पैशांची मागणी करण्यात आली. अखेर आपली फसवणूक झाल्याचे लक्षात येताच त्यांनी सायबर पोलिसांकडे धाव घेतली. तपासात अनया वर्मा, वंशिका गिल आणि नविशा सन्यम या नावांच्या बँक खात्यांवर ही रक्कम वर्ग झाल्याचे निष्पन्न झाले असून, पोलिसांनी या खातेधारकांविरुद्ध गुन्हे दाखल केले आहेत.