Parbhani Zilla Parishad election: अजितदादांची राष्ट्रवादी आघाडीवर, परभणीकरांनी दिला कौल, निकालाचा पहिला कल समोर

परभणी :  परभरणी जिल्हा परिषद निवडणुकीकडे अवघ्या जिल्ह्याचं लक्ष लागून आहे. मतमोजणीला सुरुवात झाली आहे. राष्ट्रवादी आणि ठाकरे गट आघाडीवर आहे. परभणी जिल्हा परिषदेसाठी एकूण ५४ जागांसाठी निवडणूक लढवली जात आहे. तर ९ पंचायत समितीसााठी १०८ जागांसाठी मतमोजणी होणार आहे. जिल्हा परिषदेसाठी २४७ आणि पंचायत समितीसाठी ४३३ उमेदवार रिंगणात आहेत. विशेष म्हणजे, यंदा जिल्ह्यात विक्रमी ७४.८९ टक्के मतदान झालं आहे, ज्यात परभणी तालुका ८०.२७ टक्के नोंद झाली आहे. त्यामुळे परभणीत कोण बाजी मारणार याकडे लक्ष लागलं आहे.

परभणी जिल्हा परिषदेच्या निवडणुकीसाठी मतमोजणी १० वाजता सुरू झाली आहे. पहिली पोस्टल मतमोजणी सुरू झाली आहे. निकालाच कल हाती आला असून राष्ट्रवादीने आघाडी घेतली आहे.   विशेष म्हणजे, नगर परिषद निवडणुकीत ठाकरे गट आणि काँग्रेसने बाजी मारली होती. आता  जिल्हा परिषदेत महायुती भाजप, शिवसेना-शिंदे गट, राष्ट्रवादी-अजित पवार गट आणि महाविकास आघाडी शिवसेना-ठाकरे गट, काँग्रेस, राष्ट्रवादी-शरद पवार गटामध्ये थेट लढत आहे. महायुती आता नगरपरिषदेतल्या पराभवाचा वचपा काढणार का हे पाहण्याचं ठरणार आहे.

परभणी जिल्हा परिषदेत ६ बिग फाईट्स

झरी जिल्हापरिषद सर्कल - सोनल देशमुख ( शिवसेना उद्धव ठाकरे ) V/S दिलीप देशमुख ( भाजप )

लोहगाव जिल्हापरिषद सर्कल - अजित वरपूडकर ( काँग्रेस ) V/S उत्कर्ष वरपूडकर ( भाजप )

दैठणा जिल्हापरिषद सर्कल - प्रेरणा वरपूडकर ( भाजप )V/S ज्योत्स्ना घाडगे ( काँग्रेस )

सिंगणापूर जिल्हापरिषद सर्कल - समशेर वरपूडकर ( भाजप ) V/S एकनाथ साळवे ( राष्ट्रवादी अजित पवार )

जांब जिल्हापरिषद सर्कल - संग्राम जामकर ( राष्ट्रवादी अजित पवार ) V/S बाळासाहेब रेंगे ( काँग्रेस )

पेडगाव जिल्हापरिषद सर्कल - सुहास देशमुख ( शिवसेना शिंदे ) V/S संतोष देशमुख ( राष्ट्रवादी अजित पवार )

भाजपने यावेळी जिल्हा परिषद काबीज करण्यासाठी संपूर्ण ताकदपणाला लावली. मेघना बोर्डीकर आणि रत्नाकर गुट्टे या दोन्ही नेत्यांच्या खांद्यावर निवडणुकीची धुरा सोपवली असून खास करून ग्रामीण भागात जास्त प्रचार केला आहे.  भाजपला आव्हान देण्यासाठी ठाकरे गट मैदानात आहे ठाकरे गटाकडून  खासदार संजय जाधव यांच्या नेतृत्वाखाली निवडणूक लढवली जात आहे. अनेक ठिकाणी दावाही केला असून  जिंतूर आणि सेलू पट्ट्यात ठाकरे गट करिष्मा करेल अशी चिन्हा आहे.