दोन्ही राष्ट्रवादी एकत्र आल्या तर धक्का पक्का, राजीनाम्याबाबत प्रशांत जगतापांनी खुलेपणाने सांगितले

पुणे : पुणे महानगरपालिकेच्या निवडणुकीत दोन्ही राष्ट्रवादी काँग्रेस पक्षाच्या एकत्रि‍करणाच्या जोरदार चर्चा सुरू आहेत. या संभाव्य शक्यतेने काही पदाधिकाऱ्यांना आनंद झाला आहे मात्र नैतिकतेने राजकारण करू इच्छिणाऱ्यांच्या मनात नाराजीची लाट आहे. दोन्ही राष्ट्रवादी एकत्र आल्या तर मी राजीनामा देऊन माझ्या सार्वजनिक जीवनापासून दूर होईल, अशी घोषणा पुण्याचे माजी महापौर प्रशांत जगताप यांनी केली आहे. त्यांची मनधरणी करण्याचे प्रयत्न पक्षातील नेत्यांकडून सुरू असतानाच त्यांनी पक्षाचे प्रदेशाध्यक्ष शशिकांत शिंदे आणि सुप्रिया सुळे यांची भेट घेतली. या भेटीत त्यांनी महापालिका निवडणुकीसंदर्भाने एक प्रस्ताव दिला.