एक चूक अन् खेळ खल्लास, क्षणात तरुणाचा झाला कोळसा, पुण्यातील धडकी भरवणारा VIDEO

मिळालेल्या माहितीनुसार, पुण्यातील मित्रमंडळ चौक परिसरात महावितरणचा विद्युत पुरवठा करणारा एक मोठा डीपी बॉक्स आहे. सुरक्षेच्या कारणास्तव हा बॉक्स नेहमी कुलूप लावून बंद ठेवला जातो. मात्र, संबंधित तरुणाने या बॉक्सचे कुलूप कशाच्या तरी सहाय्याने तोडले. कुलूप तोडल्यानंतर त्याने आत असलेल्या उघड्या विद्युत तारांना हात लावला. वीज प्रवाह अत्यंत उच्च दाबाचा असल्याने तरुणाला जोरदार झटका बसला आणि थेट आगीचा भडका उडाला. यात तरुणाचा जागीच होरपळून मृत्यू झाला.

या घटनेत मृत्युमुखी पडलेल्या तरुणाची अद्याप ओळख पटलेली नाही. त्या तरुणाने सुरक्षित असलेला डीपी बॉक्स फोडून आत हात का घातला? तो चोरीच्या उद्देशाने तिथे गेला होता की अन्य काही कारण होते, याचा उलगडा अद्याप होऊ शकलेला नाही.

घटनेची माहिती मिळताच पोलिसांनी घटनास्थळी धाव घेत पंचनामा केला आहे. पोलिसांनी परिसरातील सीसीटीव्ही फुटेज ताब्यात घेतले असून, त्याद्वारे घटनेचा नेमका क्रम लावला जात आहे. मृतदेह शवविच्छेदनासाठी शासकीय रुग्णालयात पाठवण्यात आला असून, पोलीस या तरुणाची ओळख पटवण्याचे प्रयत्न करत आहेत. त्याने आत्महत्या करण्यासाठी अशाप्रकारचं पाऊल उचललं का? त्या अनुषंगाने देखील तपास केला जात आहे.