Sangli : मविआत पुन्हा धुसफूस, काँग्रेस-राष्ट्रवादीच्या वादात ठाकरे गटाची उडी, चंद्रहार पाटलांचा थेट इशारा

असिफ मुर्सल, सांगली : लोकसभा निवडणुकीनंतर आता राज्यात विधानसभा निवडणुकीची तयारी सुरू झाली आहे. सर्वच पक्षांकडून विधानसभा निवडणुकीबद्दल दावे-प्रतिदावे केले जात आहेत. तसंच जागावाटपाच्या चर्चाही सुरू आहेत. दरम्यान, महाविकास आघाडीमध्ये पुन्हा एकदा सांगलीत जागावाटपावरून बिनसण्याची शक्यता आहे. सांगलीत ८ विधानसभा मतदारसंघ असून काँग्रेस-राष्ट्रवादी शरद पवार गटाकडून सर्वच जागांवर दावा केला जातोय. यात आता ठाकरे गटाच्या चंद्रहार पाटील यांनी उडी घेतली असून त्यांनी काँग्रेस राष्ट्रवादी शरद पवार गटाला थेट इशारा दिला आहे. सांगलीत दोन जागा ठाकरे गट लढवणारच असं चंद्रहार पाटील यांनी स्पष्ट सांगितलं.