नियतीचा क्रूर खेळ! एकीकडे पत्नी बाळाला जन्म देत होती, दुसरीकडे जवानाचा मृत्यू, साताऱ्यात मन सुन्न करणारी घटना!

सचिन जाधव, प्रतिनिधी सातारा: नियती कधी आणि कशाप्रकारे घाला घालेल हे कुणी सांगू शकत नाही. सातारा जिल्ह्यातून मन सुन्न करणारी घटना समोर आली आहे. भारतीय सैन्य दलात कार्यरत असलेले जवान प्रमोद परशुराम जाधव यांचा सुट्टीवर आलेले असताना रस्ते अपघातात दुर्दैवी मृत्यू झाला. ते पत्नीच्या डिलिव्हरीसाठी गावी आले होते. एकीकडे त्यांची पत्नी बाळाला जन्म देत असताना दुसरीकडे प्रमोद जाधव यांचा मृत्यू झाला. काळीज पिळवटून टाकणारा हा प्रसंग पाहून अनेकांना अश्रू अनावर झाले. ज्या लेकीच्या जन्माच्या आनंदासाठी ते गावी आले होते, त्याच लेकीवर आपल्या वडिलांचं अंतिम दर्शन घेण्याची वेळ आली. या घटनेमुळे संपूर्ण सातारा जिल्ह्यावर शोककळा पसरली आहे.