Satara: भाजप शिवसेनेच्या राड्यात शंभूराज देसाईंना दुखापत, रोहित पवारांनी कड घेतली, सख्ख्या मित्रालाही गिळायला...

मुंबई : सातारा जिल्हा परिषद अध्यक्ष आणि उपाध्यक्ष निवडीवेळी अभूतपूर्व राडा झाला. सत्ताधारी भाजप शिवसेना हे दोन मित्रपक्षच एकमेकांसमोर उभे ठाकले. अधोरेखित करण्यासारखी बाब म्हणजे शिवसेना आमदार महेश शिंदे यांची पत्नी प्रिया शिंदे यांना भाजपकडून उमेदवारी मिळाल्याने त्यांनी सदस्यांच्या जमवा-जमवीपासून संपूर्ण नियोजन केले. त्यांना जयकुमार गोरे आणि शिवेंद्रराजे भोसले यांचे मार्गदर्शन लाभले. या नियोजनाने एकनाथ शिंदे यांच्या शिवसेनेचा आणि दोन्ही राष्ट्रवादीचा गेम झाला. आश्चर्यकारक गोष्ट म्हणजे शंभूराज देसाई आणि मकरंद आबा पाटील हे दोन्ही मंत्री जिल्हा परिषद आवारात उपस्थित असतानाही आघाडीच्या (शिंदे-राष्ट्रवादी) दोन सदस्यांना मतदान करू दिले नाही. या साऱ्या प्रकाराने शिवसेना संतप्त झाली आहे. या सगळ्याचे पडसाद विधान परिषद आणि विधानसभेत उमटल्यानंतर राष्ट्रवादीचे नेते आमदार रोहित पवार यांनी शिवसेनेची कड घेणारे ट्विट केले आहे.